Striden som splittar Sogn

Regionrådet omfattar Vik, Balestrand, Leikanger, Sogndal, Luster, Lærdal og Aurland.

• LES OGSÅ: Berre eitt sentralsjukehus i fylket

- Her har vi ulik ståstad og ulike synspunkt. Vi klarer ikkje å samle oss om eitt felles standpunkt i denne saka, seier rådsleiar Torodd Urnes.

- Verkeleg synd

Helse Førde går inn for å legge ned lokalsjukehusa på Eid og i Lærdal , og at desse blir erstatta med lokalmedisinske senter.

• LES OGSÅ: Slik reagerte ordførarane

Medan Nordfjord mobiliserer for fullt for Eid sjukehus , tyder ein ringerunde til dei åtte ordførarane i Sogn på at synspunkta spriker i alle retningar.

Årdal melde seg i haust ut av regionrådet i Sogn. Ordførar Arild Ingar Lægreid reagerer på at rådet ikkje vil ta eit standpunkt.

- Det er verkeleg synd at ikkje regionrådsordføraren støttar opp kring lokalsjukehuset vårt, Lærdal sjukehus, seier Lægreid.

Uttale etter behov

Dei enkelte kommunane jobbar no med høyringsutalar til Helse Førde om helsetilbodet i Sogn. Årdal, Lærdal og Aurland arbeider saman om ein uttale.

- For oss i Vik er det like langt til Lærdal som til Førde. Vi ser på dette strategidokumentet ut frå behovet som innbyggjarane i Vik har, seier ordførar i Vik, Marta Finden Halset.

- Full splitting

- Blir Sogn splitta i denne saka?

- Både sjukehusreforma og samhandlingsreforma seier at fylkesgrensene ikkje skal vere til hinder for samhandling og gode helsetenester. Ut frå det perspektivet så spelar det lita rolle for meg om Sogn blir splitta eller ikkje, seier Finden Halset.

Lærdalsordførar Arne Sanden på si side kallar det heile for ei sterk splitting.

- I høve helsetenestene så er det i aller høgste grad det, og ikkje berre splitting, men full splitting.