- Det normale i Noreg er å møte ei slik slik utvikling som vi ser på arbeidsmarknaden no med auka aktivitet gjennom arbeidsmarknadstiltak, seier NAV-direktør i Sogn og Fjordane Tore Torsnes.
Situasjonen blir verre
- Sogn og Fjordane får sjølvsagt dei samme problema som elles i landet, sjølv om utviklinga i positiv og negativ retning ofter skjer litt seinare, seier Torsnes.
Han reknar med at situasjonen innan bygg og anlegg vil forverre seg vesentleg i 2009, trass i at mange firma framleis har oppdrag ei tid framover.
- Vi har tenkt at vi skal vere godt førebudde viss situasjonen endrar seg vesentleg, seier han.
Fleire byggjeprosjekt
Då vert det i følgje Torsnes viktig for NAV å formidle ledige jobbar i andre bransjar, og eventuelt gje tilskot til verksemder som tek inn arbeidsledige.
- Vi har diskutert med politikarar sentralt om det er ynskjeleg å setje i gang spesielle tiltak i form av å stimulere til sentrale statlege byggjeprosjekt som har lege på vent, og at ein på den måten kan få i gang aktivitet på landet, seier han.
Positivt med fleire tiltak
Distriktssekretær i LO Arvid Langeland trur heller ikkje Sogn og Fjordane vil sleppe unna permitteringar og oppseiingar, og meiner det er positivt at NAV er på bana med fleire tiltak.
- Det er viktig at lokalpolitikarar no dreg fram planar dei har om ombyggingar og utbetringar av kommunale og fylkeskommunale bygg. Også statlege prosjekt må komme fram i lyset, seier Langeland.