Truleg slutt for Åsnes

- Ein 15-16 tilsette vil i så fall miste jobben sin på skifabrikken. Det vil skje litt over tid, men i løpet av vinteren og våren 2009 vil drifta bli avvikla. Produksjonen blir flytta til Kina, der mesteparten av produksjonen er i dag, seier han.

Trist

Leiaren er trist både på dei tilsette sine vegne, og over at ein lang tradisjon er slutt .

- Viss vi legg ned vil vi gjere mykje for å hjelpe dei tilsette med å få jobb ein annan plass, seier Eilertsen.

Mykje usikkerheit dei siste åra

Dei siste åra er det berre eit fåtal skimodellar som har vore produsert på Straumsnes, og volumet har ikkje vore stort. 25-30 prosent har vore produsert i Fjaler og resten i Kina.

- Åsnes har hatt ein lang periode bak seg med mykje usikkerheit, så både tilsette og folk i lokalmiljøet har vore klar over at slike dramatiske ting kan skje, seier den daglege leiaren.

For høge kostnader

Prispresset har blitt for stort for Åsnes. Dei siste åra har dei tapt pengar på produksjonen på Straumsnes.

- Vi hadde som mål å gå i balanse, men det er ikkje realistisk komande år. Kostnadane med produksjonen på Straumsnes er for store. Prisane på dei produkta vi produserer er basert på produksjon i lågkostland. Det er veldig vanskeleg å få til med norske lønningar, seier Eilertsen.

- Det er fleire år sidan det har vore permitteringar i Åsnes. Hadde vi sett at det var håp om å halde fram produksjonen, kunne det vore eit alternativ med permitteringar. Men botnlinja tilseier at vi må slutte.