Det var Jølster Hotell på Vassenden som var tenkt som asylmottak. Eigaren av hotellet gav beskjed om at han kunne tenkje seg å leige det ut, slik at kommunen kunne drive asylmottak der. Men formannskapet sa sist måndag samrøystes nei til mottak i kommunal regi. Hovudgrunngjevinga var mangel på administrative ressursar.
-Merkeleg
-Det er merkeleg at Jølster kommune seier nei til kommunal drift av asylmottak ut frå ressursmessige omsyn, seier Arild Melvær, driftsoperatør ved Solbakken asylmottak i Flora.
Han seier kommunen ville tent minste ein halv million årleg på mottaket.
-Ut frå dei nye og høgare satsane frå Utlendingsdirektoratet, ville kommunen ha site att med minst ein halv million kroner i året på å drive mottaket. I tillegg ville det vorte nye arbeidsplassar og auka skatteinntekter. Sett i det lyset er det merkeleg at politikarane seier nei, seier Melvær.
Skuldar på liten administrasjon
Jølster-ordførar Gerd Dvergsdal meiner på si side at kommuneadministrasjonen er for liten til å starte opp eit asylmottak.
-Administrasjonen vår er for liten til å ta på seg dette, seier ho.
-Men ville ikkje kommunen fått styrka administrasjonen ved å få minst ein halv million årleg i ekstra inntekter?
-Det kan godt vere, men det er eit anna moment også. Det er at vi veit ikkje kor lenge mottaket ville vorte drive, seier Dvergsdal.