Førebels er ideen om å etablere seg i Dubai berre på tankestadiet for karane bak Moods of Norway.
Men planen er å starte ein eigen butikk i eit kjøpesenter som skal opne neste år. Det er og aktuelt å utvide kolleksjonane med nye plagg for den arabiske marknaden.
Besøkte Dubai
Moods of Norway-karane er nettopp heimkomne frå Dubai der dei hadde samtalar med sjeiken.
Stefan Dalquist og Jan Egil Flo i Moods of Norway er positive etter møtet med sjeiken.
- Vi vart inviterte til Dubai av han for å sjå på området og kjøpesenteret, forklarar Flo.
- Ja, kva kom ut av turen?
- Vi vart samde om å arbeide vidare med å få til ein butikk i Dubai.
Sjeiken kjem til Stryn
- Kor fort kan dette verte aktuelt?
- Ja, det kjøpesenteret vi såg på skal opne om eitt års tid. Men først om to-tre månader er det klart om det verkeleg vert eit etablering.
- Kor sikkert er dette?
- Det veit vi ikkje. Vi har ikkje kome så langt i forhandlingane, men det som er spennande er at denne personen har lyst å kome til Stryn. Det skal verte interessant å syne han norske tradisjonar og historien bak Moods of Norway, seier Dalquist.
- God champagne
- Og denne personen er altså ein sjeik som spanderte femstjerners hotellopphald på dykk. Korleis var det?
- Han spanderte veldig god champagne og vi hadde det veldig triveleg saman. Så får vi sjå kva som kjem ut av dette, fortel Dalquist.
- Det som han ser som Moods of Norways styrke er at kleda byggjer på norske tradisjonar. Han ønskjer å innføre noko heilt nytt som ikkje finst i Dubai frå før.