- Det er Stortinget som gjer vedtak om rovviltforvaltninga her i landet, seier Norvall Nøringset, leiar i rovviltnemnda i region ein som omfattar Vest-Agder, Rogaland, Hordaland og Sogn og Fjordane.
Denne regionen har den klart lågaste rovdyr-toleransen på landsplan, og slik ser det ut til å bli i overskueleg framtid.
Liten vilje på tinget
På Stortinget er det svært liten vilje til å diskutere nokon ny rovdyrpolitikk. På Sogn og Fjordane-benken er det berre Framstegspartiet og Åge Starheim som vil ha endringar i dagens praksis – og dei vil endå nærare ein nulltoleranse for rovdyr i Sogn og Fjordane.
- Vi har levert eit dokument 8-forslag om ein endå strengare praksis. Det var lett å få i gang debatten, men det kom ingenting ut av det, seier Starheim.
Solid forlik
Det er forliket Bondevik 2-regjeringa gjorde med Arbeidarpartiet og Sosialistisk Venstreparti i 2004 som danna grunnlaget for stortingsmeldinga ” Våre rovdyr i norsk natur”. Her vart det slege fast at det ikkje skal vere ynglande rovdyr i vestlandsregionen, at streifdyr skal tolererast men at beitedyr skal prioriterast. I praksis har det betydd at det har vorte gitt fellingsløyve på til dømes bjørn når den tek til å drepe sau.
- Rovdyrforliket står nok ved lag, seier Ingrid Heggø frå Arbeidarpartiet.
- Kva då med ei som håpar på større toleranse for rovdyr på Vestlandet?
- Dei får ikkje så veldig stort gehør hjå meg i alle fall. Eg meiner vi må ta utgangspunkt i skadane bjørnane gjer når dei går rundt.
- Slik at neste gong ein bjørn drep sau i Sogn og Fjordane blir også den skoten?
- Det går eg ut frå, seier Heggø.
(Artikkelen held fram under biletet)
Ikkje ein gong Venstre...
Ikkje ein gong Gunvald Ludvigsen frå miljøpartiet Venstre er særleg ivrig etter nokon ny rovdyrdebatt.
- Det går alltid an å ta ein diskusjon, men vi har eit breitt forlik i stortinget rundt rovdyrpolitikken og det har fungert ganske greitt, seier han.
Dei einaste partia som stod utanfor forliket frå 2004 var Framstegspartiet og Senterpartiet. Begge ville ha endå lågare toleranse for rovdyr, men Senterpartiet vil ikkje diskutere dette på nytt så lenge dei sit i regjering.
- Feil fylke
Med andre ord er bjørn og andre rovdyr sin einaste sjanse til å få vere i fred i vestlandsfylka at dei ikkje får ungar og at dei stort sett let sauene gå i fred.
- Men vi må hugs på at bjørnen kan ikkje lese så han kan ikkje forskriftene for kvar han skal bevege seg heller, seier ein lett lakonisk Nøringset.
- Bjørn som drep sauer heromkring må nok sjå i augo at han har drepe sau i feil fylke, seier Erling Sande i Senterpartiet.