Mugg hadde stor suksess med fulle hus på Den Nationale Scene i Bergen i 1991, og det er oversett til fleire språk.
To ulike damer
Stykket handlar om dei svært så ulike damene, Maggi og Irma. Norske Maggi er ved første augekast ei tilknappa overklassedame, medan Irma er ei steintøff, pensjonert, finlandssvensk hospitalkokke. Dei er begge i sekstiåra og blir tvinga til å dele hotellrom på pakkereise i Moskva.
Urpremiere på Tryti Vennerød-stykke
Fråflytting er det svært så aktuelle temaet for eit stykke av Maria Tryti Vennerød, som får urpremiere i Førde 23. november. Tittelen er Gokk, og stykket som teateret har gitt karakteristikken komisentimentalt, handlar om Siv som gjer det slutt med kjærasten sin og reiser heim til Gokk. I Gokk er ammunisjonsfabrikken lagt ned og faren til Siv har lansert Det store løftet for heimstaden. Men, det er når Siv kjem heim at det verkeleg blir bråk. Tryti Vennerød debuterer som sceneinstruktør med dette stykket. Turnèen blir avslutta på Sandane laurdag 8. desember.
Hetlesaka som teater
”Mikal Hetles siste ord” av Edvard Hoem har urpremière fredag 14. desember. I 1906 vart Henrik Hetle funnen død på Hetlestøylen i Viksdalen. Naboen Mikal Hetle og sonen Ole vart dømde for drap i 1907. Saka rysta eit lite lokalsamfunn og verserte i rettsapparatet i 40 år. Stykket blir spelt i Førde i desember og skal på turnè i Sogn og Fjordane i januar 2008.
Krim på museet
I tillegg til tre sjølvproduserte stykke, vil teatergruppa ProScenia gjeste SoFt med krimvandringa ”Den eines død, den andres liv”. Dette er teatret sitt bidrag til Heilt kriminelt – sunnfjordske krimdagar og finn stad på Sunnfjord museum, laurdag 22. september. Her blir ei kvinne funnen drepen i skogen. Publikum blir tatt med to veker tilbake i tid, då mordet fann stad, og blir vitne til dei ulike scenene som utspann seg der.