- Eg er overraska over talet sidan det ikkje er så mange innbyggjarar i Årdal. Men vi har sett fenomenet før i Hammerfest, men så stabilt som det er i Årdal er ganske overraskande, seier produsent Kim Birkedal Hartmann.
Kim Birkedal Hartmann er busett i Frankrike og er fjerde generasjon som produserer konjakk. Då han får presentert tala for årdalskonjakken sit han i Marocco på ein restaurant like ved Atlanterhavet.
Lokal identitet
Han trur lokal identitet til produktet har mykje å seie for dei gode salstala.
- Eg var i Årdal for ikkje lenge sidan. Då eg var innom Vinmonopolet såg eg eit skilt som fortalde at årdalskonjakken var utselt. Eg høyrde to-tre personar som gjekk bort til kassen og spurde kvar er konjakken min. Folk er tydelegvis trufaste mot sitt eige produkt.
500 fleire flasker
Årdalskonjakken har selt nøyaktig 1813 flasker i første tertial. Det er 500 fleire flasker enn nummer to på lista. Og konjakken frå Årdal har berre vore i sal i to av dei fire månadene.
Birkedal Hartmann meiner han har satsa heilt rett.
- Eg var skeptisk i byrjinga, men Torstein Kvam var flink til å overtale meg, og i dag er eg glad for at eg høyrde på han.