Og i verste fall kan det bli forbod mot å ha dyra på fjellbeite. Grunnen er frykt for jerve-sommar i området.
Mattilsynet ber sauebøndene ha ein plan dersom fjellbeita ikkje kan nyttast i år, seier senior-rådgjevar Olav Hermannsen.
- Bøndene bør iallefall tenkje gjennom kva moglegheiter dei har, seier han.
Uvanleg mykje jerv
Det var gitt løyve til felling av seks jervar i Indre Sogn no i vinter, men ingen vart tekne. No skal statens naturoppsyn prøve å ta to mellom Årdal og Lærdal i løpet av mars, men mykje tyder på at det er uvanleg mykje jerv i Indre Sogn.
- Det er gjort mange observasjonar av spor etter jerv. Viss det ikkje vert gjort noko med dei, fryktar vi at det kan bli store problem, seier Hermannsen.
Kan bli beitenekt
I ei orientering som mattilsynet har sendt ut til sankelaga i heile Indre Sogn blir det peika på at det lett kan bli aktuelt å måtte ta dyr tidleg heim frå beite, og i verste fall bli beitenekt.
Fortun sankelag skal ha møte om saka i kveld, men sauebonde Steinar Mørkrid fryktar jervestammen er så stor at beitenekt kan bli ein realitet.
- Viss det ikkje vert tekne nokre jervar, så fryktar vi det, seier bonden.
Mykje sau og lite innmark
Å halde fleire hundre sauer på heimebøen er uaktuelt.
- Då fryktar vi at vi er redde for å slutte med sauer, for vi har mykje sau og lite innmark, seier han.
Frustrasjonen går i hovudsak mot direktoratet som dei meiner ikkje tek jerveplaga i Sogn på alvor.