Nominasjonsnemnda hadde innstilt Berit Seljeseth Osa på førsteplass, men tidlegare denne veka vart det lansert ei alternativ liste med Hallgeir Helland som listetopp.
- Vedgår at eg har tapt
Nominasjonsmøtet i Flora torsdag kveld gjennomførde ei prøverøysting mellom Seljeseth Osa og Helland. Den avrøystinga vann Seljeseth Osa med 31 mot 17 røyster. Deretter trekte Hallgeir Helland sitt kandidatur, og gratulerte Berit Seljeseth Osa med sigeren.
- Eg føler at eg har ytt og bidrege med det som skal til, og vedgår at eg har tapt. Eg gratulerer Berit med førsteplassen, sa Helland, idet han kasta inn handkledet.
- Det følast godt, det gjer det. Eg er glad vi er komen i mål, og har landa veldig fint i kveld, seier Osa etter sigeren.
Eit splitta Høgre
Oppkøyringa til nominasjonsmøtet har vore alt anna enn knirkefri. Leiaren for nominasjonsnemnda, Siv Aase Eggen, mottok eit anonymt trugselbrev som krevde Seljeseth Osa fjerna som toppkandidat. Saka vart meld til politiet. Seljeseth Osa møtte motstand frå fleire hald. Trekløveret Anders Haave, Bjørn Hollevik og Åse Iren Korneliussen laga ei alternativ Høgre-liste med Hallgeir Helland som toppkandidat.
Og det var eit splitta Høgre som kom til nominasjonsmøtet. Det var tydeleg at både Berit Seljeseth Osa og Hallgeir Helland hadde støttespelarar i salen. Og den første som gjekk på talarstolen, Magne Solheim Olsen, la lista for kva som venta utover kvelden.
- Vi kan vore einige om at mykje har vorte sagt, og mykje har vorte gjort. Og mesteparten av det skulle vore usagt og ugjort. Det er her på dette møtet vi skal bryne oss på kvarandre dersom vi er ueinige.
- Han har brei erfaring
Og ueinige var dei, dei to motpolane. Fleire var framme og fortalde kor flink Seljeseth Osa var. Ein av trekløveret bak motstandaren, Åse Iren Korneliussen, prøvde å sanke stemmer til Helland.
- Hallgeir har brei erfaring frå politikken. Han er særs god på næringspolitikk. Han er visjonær på Florasamfunnet sine vegne, og han samarbeidar godt med andre politiske parti.
Ville ikkje stå på lista
Men trass i gode skussmål frå fleire hald heldt det ikkje til mål. Støttespelarane til Seljeset Osa vart for sterke. Og når Helland ikkje kunne trone på toppen, ville han ikkje stå på lista i det heile.
- Eg kunne vore på førsteplassen. Det hadde eg planlagt utifrå ein privat situasjon.
Ho som no kan kalle seg Høgre sin ordførarkandidat er glad det heile er over. Med seg på andreplass på lista har ho 18 år gamle Jacob Nødseth. No ser ho fram til å få ro i partiet.
- Vi får gjere ein god valkamp, så tenkjer eg at vi får dette til.
- Føler du at du har heile Høgre med deg?
- Ja, det føler eg så absolutt at eg har.