– Eg tykkjer det er heilt rett. Dette har vore ei sak som har vart ei stund, så her har dei gjort heilt rett, seier Audun Grønnevik, tillitsvald i Westcon Yard i Florø. Verftet var tidlegare kjent under namnet STX Norway Florø.
Høgsterett har forkasta anken frå NHO, Norsk Industri og åtte verft i spørsmålet om allmenngjering av tariffavtalar på norske verft.
Dommen frå Høgsterett er samrøystes, og slår fast at utanlandske tilreisande arbeidarar skal ha same arbeids- og lønnsvilkår som norske verftsarbeidarar.
- LES OGSÅ:
Er avhengige av utanlandsk arbeidskraft
Verftsnæringa ønskte både erstatning for tort og svie, samt at vedtaket skulle omgjerast.
– Kva konsekvensar ville det fått for verftet i Florø?
– Det er vanskeleg å seie, men eg trur det ville vorte veldig dårleg for dei som er innleigde frå utlandet. Vi er jo heilt avhengige av dei, seier Grønnevik.
Dommen i Høgsterett slår fast at NHO, Norsk Industri og åtte verft vert dømde til å betale sakskostnadene som LO, Fellesforbundet og Staten ved tariffnemnda har hatt, med til saman 4.072.866 kroner.
Trur det kjem i orden til slutt
Han trur dette er eit steg på vegen til å få rettferdige forhold til bransjen.
– Det trur eg, men det tek nok litt tid før det går seg til. Men eg trur det kjem i orden på litt sikt, seier Grønnevik.
Han fortel at det ikkje har vore store skilnader for dei tilsette hjå dei. Vi har halde oss innanfor lova, seier Grønnevik.
– I fire-fem år har det pågått ein strid mellom staten og arbeidstakarorganisasjonane på ei side, og næringslivet og verftseigarane på den andre sida. Kva fortel det?
– Dei tolkar det på forskjellige måtar. Dei meiner verftsindustrien går under dersom verfta må betale tariffløn. Men det har ikkje eg tru på, seier Grønnevik.