Beinbrot sette punktum for Førde-karriera

Volleyballspelaren har ikkje klart å kome seg inn att på volleyballbana at han braut foten før cupfinalen i fjor.

Heller ikkje i år fekk Morten Kvamsdal medverke då Førde på nytt møtte Nyborg. Etter eit forsøk på å komme tilbake på volleyballbana i romjula, gir han no opp.

– Eg prøver så godt eg kan å slå meg til ro med at eg ikkje kan spele meir innandørs. Då er det best å konsentrere seg om det eg kan, så får dei ta seg av det som skjer på bana, smiler han.

Fekk flaschback

Kvamsdal gjer som Geir Eithun, satsar på ei karriere som sandvolleyballspelar. For medan han i sommar fortalde om mental sperre så fort han entra volleyballbana innandørs , meiner han no å ha kome over denne biten.

Diverre er det no foten som ikkje taklar påkjenningane å spele på hardt underlag.

• LES OGSÅ: Blir ute med skade i seks månader

– Eg prøvde så vidt i jula, men etter ei trening inne så var det to-tre dagar ute utan trening. Då er det ikkje verdt det. Så no er det sandvolleyball for alle pengane, seier han.

Den dramatiske episoden mot Tromsø i seriekampen i fjor, set friskt i minnet. Etter ei blokk landa han på foten til ein motspelar. Legen vart broten rett av.

• LES OGSÅ: Morten Kvamsdal braut leggen under Førde-Tromsø

– Eg får stadig flaschback til hendinga i fjor når dei blokkar ut på kanten her. Det sit framleis i, seier han og ser lagkameratane kjempe mot Nyborg og sandvolleyballmakker Øyvind Hordvik.

– I fjor var det kjipt

Fjorårets finaletap mot Nyborg såg han frå sjukesenga. Då Førde tapte på nytt i år, var han komen i idrettshallen.

– Det er mykje greiare i år enn i fjor. Då var det kjipt, for å bruke finare ord. Eg hadde sett så lenge fram til finalen, å slå Nyborg og gamle lagkameratar. I år var det slik det måtte bli, seier han og vedgår at kjenslene framleis er sterke for Førde volleyballklubb.

– Nyborg har vunne nok

Difor håpa han også at klubben han framleis står som spelar i, tukta både Nyborg og sandvolleyballmakker Øyvind Hordvik.

– Nyborg har vunne nok. Øyvind har vunne nok, eller i alle fall mange gonger, så eg unnar verkeleg Førde dette trofeet, seier han og ser Nyborg slå inn poeng etter poeng.

– No spelar jo Øyvind der, så han blir sikkert veldig nøgd med at eg held med Førde, humrar han.

Set pris på Førde

– Men eg er veldig takksam for støtta eg har fått frå Førde i perioden som har vore, seier han.

– Kva har dei kunne gjort for deg?

– Tja, kva kan ein gjere. Ein kan vise at ein bryr seg, støtte opp. Det er rett og slett kjempefine folk i og rundt Førde volleyballklubb. Og det er slikt ein ikkje skal ta for gitt. Eg set veldig, veldig stor pris på klubben og måten dei har støtta meg.

– Byrja okay

Men i Domus Athletica måtte Kvamsdal sjå lagkameratar som sleit stort med heiltente Nyborg-spelarar.

Bergenslaget leia heile vegen og vann til slutt 3-0 i sett.

• LES OGSÅ: Førde leia ikkje ein gong

– Førde byrja som vanleg okay, men så dabba det av etterkvart. Nyborg spelar stabilt godt. Dei har få svakheiter, server bra og er gode i mottak. Då er dei frykteleg vanskelege å slå, oppsummerer Kvamsdal.