På landsbasis gjer Høgre sitt beste skuleval nokosinne. Trenden er den same i Hordaland, der partiet er det klart største etter at 14 699 vidaregåande elevar ved 51 skular har gjeve si stemme.
Høgre får 31,4 prosent av stemmene, og aldri før har det blå partiet gjort eit så godt skuleval i Hordaland.
– Utruleg god kjensle
Jubelen var stor i Høyres hus i Bergen.
– Her er det veldig god stemning. Vi er det største partiet og er nesten dobbel så store som AUF. Det er ei utruleg god kjensle, seier ein glad leiar Erik Skutle i Unge Høgre i Hordaland.
Han seier dette gjev ekstra energi inn i valkampen mest avgjerande fase.
– Vi skal bruke denne positive opplevinga til å mobilisere så mange som mogleg.
Fleire kan jubla
Men det er ikkje berre Høgre som kan jubla for gode tal i Hordaland. Også Miljøpartiet Dei Grøne og Piratpartiet kan seia seg nøgde med årets skuleval.
MDG er større enn Senterpartiet og omtrent likt med Kristeleg Folkeparti i Hordaland, medan Piratpartiet får 4,0 prosent av stemmene.
– 4,3 er eit veldig godt resultat for oss, med tanke på ressursane våre og utgangspunktet vårt, meiner talsperson Ingrid Ophaug Dahl i Grøn Ungdom.
– Dette er det vi treng for å komma oss inn på tinget frå Hordaland.
I AUF vel dei også å sjå positivt på valet, trass ein liten nedgang frå 2009.
– Vi har greidd å forsvara det nasjonale resultatet. Det er vi veldig nøgd med, kommenterer leiar Linn Kristin Engø i Hordaland AUF.
Venstre med framgang
På Bergens eldste skule, Bergen Katedralskule, er det Venstre som er den store vinnaren. Her stemmer nesten kvar fjerde elev det liberale partiet, noko som er 17,5 prosent opp frå skulevalet fire år tilbake. Dei går også opp med 2 prosent i forhold til valet i 2009.
På «Katten» får Dei Grøne 11,9 prosent av stemmene medan Høgre får 12,2 prosent.
– Kjempar hardt
På landsbasis går Sosialistisk venstreparti tilbake med 5,2 prosent frå 2009. Men i Hordaland er det mindre, for her går SV ned 1,8 prosent frå 2009 til 6,8 prosent i år..
– Vi ligg vesentleg over landsnittet for SV, og det tyder at SU har gjort ein fantastisk jobb på skulane her i fylket, meiner SV-leiar Audun Lysbakken.
– Det lovar godt for sluttspurten, der vi kjempar hardt for å berge SV sitt mandat frå Hordaland, seier Lysbakken.
Kraftig tilbake
Det var tidlegare SV og Frp som gjorde gode val når vidaregåande elevar gjekk til valurnene. I 2005 hadde dei høvesvis 14,7 og 26,6 prosent av stemmene.
Frp går kraftig tilbake i årets skuleval, med 14,1 prosent av stemmene.
Saka vert oppdatert