Onsdag morgon melder politiet at mannen som tysdag kveld blei påkøyrd på Ågotnes på Sotra, er ein 27 år gamal mann.
Tilstanden hans er alvorleg, men stabil, ifølgje politiet.
Mannen blei ifølgje politiet påkøyrd, for deretter å bli slept mellom 100 og 200 meter etter ein bil.
Alvorleg skadd
– Det var ei alvorleg ulukke. Ein person er frakta til sjukehus med luftambulanse. Me har rekvirert kriminalteknikar som skal sjå på ulukkesstaden, fortel Inger Myrtvedt som er operasjonsleiar i Hordaland politidistrikt.
Onsdag morgon opplyser Hordaland politidistrikt ifølgje NTB at mannen er alvorleg skadd, men at tilstanden er stabil
Etter det politiet veit skal det berre ha vore ein bil involvert i ulukka. Statens vegvesen si ulukkesgruppe skal vera på veg til staden.
Bilføraren til legevakt
Seint tysdag kveld jobba politiet sine kriminalteknikarar på staden.
Føraren av bilen som slepte med seg personen er frakta til legevakt for blodprøve.
– Det er ikkje noko særskild mistanke om ruskøyring, men grunna alvoret ser me det som naudsynt å ta blodprøve, seier Myrtvedt.