Hobbyspelarar må køyra tur/retur Aserbajdsjan

Serieoppsettet for 3. divisjon er nettopp blitt klart, og reaksjonane lar ikkje venta på seg.

Mange lag må reisa svært langt for å gjennomføra alle kampane.

– Skandale og katastrofe

Tertnes i Bergen er blant laga som blir hardt ramma av dei nye oppsettet. Spelar Daniel Hatland har rekna ut at køyrelengda tilsvarer tur-retur Aserbajdsjan.

Han har lagt ut køyreruter og kart på Twitter, og har kommentert oppsettet med klare ord:

– Ingen tvil om at det er skandale. Det er jo ingen som har tid til det der. Eller lyst, skriv Tertnes-spelaren.

Han seier til NRK at han laga kartet fordi han blei så irritert over dei lange køyreturane.

– Eg trur det er mange spelarar som ikkje har høve til å vera med lenger. Vi er jo hobbyspelarar og mange har familie, seier Hatland.

Her er meldinga han la ut på Twitter:

Også sportsleg leiar i Tertnes herrar senior er i harnisk over oppsettet.

– Dette er katastrofe både økonomisk og sportsleg, sett i forhold til belastning på spelarar og støtteapparatet, seier han til nettstaden Hordalandsfotball.

• Her kan du sjå heile oppsettet for 3. divisjon i 2014 (pdf)

Fordeler belastninga

Norges Fotballforbund (NFF) opplyser at det har blitt meir og meir krevjande etter ei omlegging av 3. divisjon før 2011-sesongen. Nokon lag har fått lange reiseavstandar, men forbundet prøver å utjamna dette frå sesong til sesong.

– Eg har forståing for at dei synes dette er langt, seier fagansvarleg for kampadministrasjon, Are Hokstad, i fotballforbundet.

– I eit forsøk på å endra belastninga som har vore stor på nokre få klubbar enkelte stader, har vi i år snudd på dette med det resultat at klubbar som har hatt mindre belastning tidlegare får større reiseverksemd i år, forklarer han.

3. divisjon består av 12 avdelingar som inneheld 14 lag kvar, med unntak av dei to nordnorske avdelingane som begge består av 12 lag.