– Ein person ringde inn til oss og hadde funne den sakna sovande i uthuset sitt, fortel operasjonsleiar Terje Magnussen i Hordaland politidistrikt.
Politiet fekk melding klokka 11.15.
– Han ser uskadd ut, men er tatt hand om av helse og blir sendt til sjukehuset på Voss for ein sjekk, seier Magnussen.
Politiet har få opplysningar om kva som har skjedd, men dei vil opprette ei undersøkingssak for å finne ut kva som har skjedd.
Forsvann etter krasj
– Eit vitne såg ein person som sprang vekk frå bilen og til skogs. Vi trur det kan vere bilføraren, og er redd for at han kan vere skadd, seier Magnussen.
Klokka 04.40 fekk politiet melding om ei trafikkulykke med eit einsleg køyretøy ved Takla på riksveg 13 aust for Voss, i retning mot Granvin.
Ulykka skal ha skjedd i ein sving rett sør for Bømoen.
– Det er 80-sone på staden og bilen har køyrd rett inn i autovernet. Bilen har fått store materielle skader, seier Magnussen.
Sette i gong redningsaksjon
Politiet har hadde hundepatrulje ute i natt, utan noko resultat i søket.
I nitida søndag morgon trappa politiet opp leitinga. Både Politiet, Røde Kors og Norske Redningshundar hjelpte til i leitinga.
– Vi får ikkje kontakt med eigaren av bilen, som vi antek er ein mann i 20 åra. På bakgrunn av dei store skadane på bilen, så er vi redd for at føraren kan liggje skadd i terrenget. Difor har vi no starta ein redningsaksjon, sa Magnussen til NRK søndag morgon.
Eit Seaking helikopter frå Florø var med i leitinga.