SISTE: Redningsskøyta «Kristian Gerhard Jebsen» er på staden, og sleper havaristen mot rolegare sjø.
– Foreløpig har vi situasjonen under kontroll. Vi heldt på med lense no, fortel skipsførar Kjell Storåker.
Redningsskøyta sleper med seg fritidsbåten inn til land.
Fire personar berga
SLEPES TIL LAND: Havaristen slepes til land med hjelp av redningsskøyta «Kristian Gerhard Jebsen».
Foto: Redningsskøyta «Kristian Gerhard Jebsen»Politibåt, redningsskøyte og luftambulanse har rykka ut for å hjelpe fire personar om bord på ein båt, vest for Turøy ved Greipingen fyr i Øygarden kommune.
Klokka 10.14 var politibåten på staden og kunne melde om at ingen personar var hamna i sjøen.
– To kvinner er tatt over i ein lokal fiskebåt, og to menn er igjen i båten for å lense. Politiet hjelper med pumper og prøver å redde båten, seier operasjonsleiar i Hordaland politidistrikt Kjersti Eidsnes.
– Det såg mørkt ut ei stund. No jobbar dei for harde livet der ute for å berge fritidsbåten.
Politiet kan endå ikkje seie noko om årsaka til at båten tok inn vatn.
– Dei som var om bord på båten seier dei ikkje har truffe noko skjær, så det kan skuldast ein lekkasje i ei eller anna form, seier Eidsnes.
Har varsla båtar i området
– Klokka 9.40 fekk me melding om at ein 34 fots Fairline-båt med fire personar om bord tek inn vatn i motorrommet, seier Eidsnes.
– Dei seier dei ikkje kjem til å halde seg flytande mykje lenger.
Dei fire personane om bord skal ha på redningsvestar. Båtar i området er varsla.
– Kor alvorleg er situasjonen for dei fire om bord?
– Me har hatt direkte kontakt med dei. Dei oppfattar det som ganske dramatisk, seier Eidsnes.