Vil ha eitt felles brannvesen for heile Sogn og Fjordane

Ifølgje VG står brannvernet i Norge framfor tidenes omorganisering, dersom medlemene av den såkalla Brannstudien får det som dei vil.

Utvalet legg fram si innstilling i morgon, men ifølgje avisa er det snakk om eitt brannvesen for kvart fylke.

I Sogn og Fjordane er det i dag i stor grad framleis kommunale brannvesen, men fem kommunar i Sogn har gått saman om det som heiter Sogn brannvern. I tillegg er det nokre få andre kommunar som har eit tett samarbeid.

• LES OGSÅ: Risikerer å tilkalle feil brannvesen - føreslår nye regionale grenser
• LES OGSÅ: Brannbil med toppfart 60 km/t

– Dette forslaget høyres veldig lite realistisk ut, seier dagleg leiar ved Alarmsentralen i Sogn og Fjordane, Terje Brandsøy.

Han sler fast at det nok er naudsynt med ei viss omorgansisering av brannvesen- og andre beredskapstenester i Norge, men at ein då må sjå på lokale tilhøve og ikkje berre gå ut frå fylkesgrensene.

Brannsjef i Førde, Bernhard Øberg, har tidlegare stilt seg positiv til ei større omorganisering av brannberedskapen i Norge. Han meiner at det må kome på plass eit nytt brannkart for Norge innan 2020.

– Mitt framlegg er at fleire kommunar bør gå i lag og samarbeide om eit felles brannvesen. Anten i form av vertskommune eller som eit interkommunalt selskap. I teorien så kunne ein berre hatt eitt brannvesen her i fylket, meiner Øberg.