Vil byggje oppatt fv.664 Otterdalsstranda til same standard som før

Den vesle bygda Otterdal i Hornindal kommune har vore utan veg sidan orkanen Dagmar vaska vekk 1,7 kilometer av fylkesvegen mellom Otterdal og Grodås i romjula.

No tilrår fylkesrådmannen at vegen blir bygd opp att til same standard som før, men utan rassikring.

Fylkesrådmannen legg til grunn at aktivitetsnivået på rassikring skal tilpassast tilskotet frå staten. Det skal ikkje nyttast ordinære fylkeskommunale midlar til investeringar på rassikring.

Hovudutvalet for samferdsle skal handsame saka 12. april, og fylkestinget gjer endeleg vedtak 17. april.

• LES OGSÅ: Skuleskyssen vart for farleg - no blir barnefamilien tvinga til å flytte
• LES OGSÅ: Vil ikkje tvangsevakuere Otterdal

Kan opnast hausten 2013

Statens vegvesen har vurdert fem ulike løysingar for å byggje opp att vegen. To av løysingane går på å byggje opp att vegen til den standarden han hadde før Dagmar kom, med og utan sikringstiltak.

Det vil koste mellom 23 og 53 millionar kroner å byggje opp att vegen utan sikringstiltak. Med ei slik løysing kan vegen opnast hausten 2013.

(Artikkelen held fram under videoen)

Sikring vil utsetje vegopninga til 2014

Alternativet med å byggje opp att vegen med sikringstiltak vil ha ei kostnadsramme på mellom 58 og 136 millionar kroner. Eit slikt alternativ vil i verste fall utsetje vegopninga til hausten 2014.

Dei tre siste alternativa ser på ulike tunnelløysinar med ei kostnadsramme på mellom 103 og 674 millionar kroner, alt etter kva løysing ein vel å gå for. Vegen vil ikkje kunne opnast før 2015 med ei tunnelløysing.

Fylkesrådmannen har også vurdert eit nullalternativ med nedlegging av vegen som offentleg veg, men vil ikkje tilrå dette.

• LES OGSÅ: Må klare seg utan veg til 2013
• LES OGSÅ: Vil ikkje løyve ekstramidlar for å byggje tunnel til Otterdal

Held fram med mellombels løysing

Ordføraren i Hornindal har bedd Samferdsledepartementet om ekstra statlege løyvingar til å byggje ein tunnel på om lag to kilometer for å få ein trygg og sikker veg til Otterdal.

Departementet seier at dei ikkje har moglegheit til å gje ekstra statlege løyvingar til tunnel i 2012. Det er ikkje teke stilling til eventuelle ekstramidlar til oppryddinga av skadane på vegen til Otterdal.

Fylkeskommunen har sett i verk førebelse transporttiltak med båt. Desse gjeld i første omgang fram til 1. juni 2012. Den mellombelse transportløysinga må vidareførast fram til vegen er bygd opp att.

• LES OGSÅ: Her kan familiebilen bli ståande utan vegsamband i minst eitt år