Statens helsetilsyn har vedteke å avgrense autorisasjonen slik at legen ikkje kan utføre legevaktteneste utanfor sjukehus. Legen har brote kravet til forsvarleg helsehjelp og reglane om journalføring, opplyser fylkeslege Per Stensland.
- LES OGSÅ:
Statens helsetilsyn og Fylkesmannen i Sogn og Fjordane har behandla saka som tilsynssak. Saka handla om framferd og pasientbehandling som vikarlege ved ei interkommunal legevakt.
Hadde 22 vikariat i Norge
Legen er utdanna og busett i utlandet, har norsk autorisasjon og er spesialist i kvinnesjukdommar og fødselshjelp. Legen hadde hatt 22 vikariat rundt om i Norge.
Fylkesmannen i Sogn og Fjordane oppretta tilsynssak mot legen på bakgrunn av fleire bekymringsmeldingar. Bekymringane knytte seg til påstandar om at legen feilvurderte medisinske tilstandar, ikkje ville ta imot og undersøke pasientar under legevakt, og heller ikkje syte for transport med ambulanse til sjukehus.
«Uforskamma og avvisande»
Legen kom på grunn av dette i konflikt med pasientar, pårørande og anna helsepersonell. Det kom også fram påstandar om at legen hadde stilt seg tvilande til dei observasjonane og vurderingane som anna helsepersonell hadde gjort. Legen blei oppfatta som uforskamma og avvisande.
Vanleg reaksjonsform overfor helsepersonell ved påvist fagleg uforsvarleg praksis utan sjukdom eller misbruk av rusmiddel, er ei åtvaring. Legen har her fått ein uvanleg sterk reaksjon, skriv fylkeslege Per Stensland i ei pressemelding.
Den aktuelle legevakta har gått gjennom rutinane sine for tilsetting og opplæring med sikte på å unngå å engasjere ein tilsvarande vikar i framtida.