Mange ferjer vert no i sommarmånadane styrt av personer med sommarjobber eller av pensjonistar. For Sverre Rabben er jobben på Husavik-Sandvikvåg eit avbrekk frå den vanlege jobben som kaptein på ein fiskebåt.
– Det er godt med ei avveksling. Og så er det så hyggelege folk som arbeider på ferjene, seier austevollingen.
Full konsentrasjon
MF Marstein går vanlegvis mellom Krokeide og Hufthamar. I dag er det flytta til det andre Austevolls-sambandet. Det er ei rute som kan være verutsatt. Men det er ikkje det som er den største utfordringa for Rabben.
– På veg ut og inn til kai må det være full konsentrasjon. Då skal eg ikkje ha nokon distraksjonar på brua.
– Får du oss trygt på land no då?
– Me får sjå. No må eg i alle fall ha fokus på innseglinga til Sandvikvåg.
Dette meiner NRK om Husavik-Sandvikvåg:
Overfart og kaiar: 5
Ikkje den mest spektakulære overfarten, men fint å sjå ut mot Fitjarøyene. Innseglingane til kaiane trekk litt opp.
Fartøy: 3
Eg tok reserveferga Marstein, men det er vel mest rettferdig å bedømme MF Herlaug som vanlegvis går på strekninga. Den er frå tidleg 70-tal, utan kafe og med salung under bildekket. Ingen kjem til å sakne den når den forsvinn om ikkje for lang tid.
Fasilitetar og service: 3
Hyggelege folk om bord, ellers lite som trekk opp. Pluss for sjølvbetjening med kaffe. Minus for at kanna var tom.
Nostalgi og oppleving: 2
Lite nostalgi og inga stor oppleving.
Totalt: 13 (av 40)
Denne karakteren får strekningane: