Prosjektleiar Kjell Johansen i Vegdirektoratet, vedgår at regjeringa sin målsetnad om å få fleire til å reise kollektivt og meir varetransport sjøvegen, ikkje viser særleg att på statistikken.
- Tal køyrde kilometer totalt iløpet av 2010 vil vere på 42,4 milliardar køyrde kilometer. For ti år sidan var det 35 milliardar køyrde kilometer, seier han.
Versting i fjordfylket
Ein av dei som merkar godt den stadig aukande trafikken, er matros Geir Olav Settevik på ei av ferjene i Sogn. For Sogn og Fjordane er ein av «trafikkverstingane». Siste året vaks trafikken med godt over 2,7 prosent i fjordfylket.
Sjølv om ferja over Sognefjorden går oftare enn nokon gong, fortel Settevik om fleire og fleire bilar på kvar avgong.
- Det er fleire, og nesten alltid berre ein i kvar bil, seier han og vedgår at han ikkje er redd for å bli arbeidslaus med det første.
(Artikkelen held fram under avstemminga)
Vil auke meir
Også trafikkprognosane, som ligg til grunn for Nasjonal Transportplan, viser at trafikken vil halde fram å auke i lang tid framover. På landsbasis er det venta ein samla vekst i trafikken på 1,4 prosent til 2014.
- Trafikkveksten på landsbasis heng saman med mange ting; folketalsutvikling, prisutvikling både på bil og drivstoff og den generelle økonomiske utviklinga i landet, seier avdelingsdirektør i Statens Vegvesen, Nils Magne Slinde.
- Redde politikarar
Fleire miljøorganisasjonar er fortvila over utviklinga. For i underkant av 20 prosent av dei totale klimautsleppa her i landet, kjem frå nettopp biltrafikken. Fagansvarleg for transport i Bellona, Kari Asheim, skuldar politikarane for å vere pysete.
Asheim peikar på avgifter, investeringar i tog og bussar og avgifter for å gjere miljøvennlege bilar lønnsame. Dette er tiltak ho meiner politikarane kjenner til, men ikkje vågar å gjennomføre.
- Berre for å stogge veksten i utslepp, så må det svært sterke verkemiddel, store investeringar og sterk politisk vilje til. Den politiske viljen er eg i tvil om er til stades i dag. Eg trur også at det i veldig stor grad handlar om at ein er redd for å bli upopulær, seier ho.
Avviser kritikken
Statssekretær i Samferdsledepartementet, Lars Erik Bartnes, avviser all kritikk og seier Regjeringa er i gang med å nå sine mål om reduserte utslepp.
- Norge har gått frå å vere nesten ein versting i Europa på utslepp frå nybilar, til å bli ein av dei beste i klassen, seier han.