Dette syner ein rapport frå Menon Business Economics, attgjeve i Bergens Tidende. Ikkje uventa er det Møre og Romsdal som toppar lista, med ein eksportverdi på 235 000 kroner pr innbyggjar.
Så fylgjer Hordaland, Vest-Agder, Rogaland og Sogn og Fjordane. Oslo kjem på plassen bak Sogn og Fjordane med ein eksportverdi på 126 000 kroner pr innbyggjar.
I rapporten er også tenester teke med, i tillegg til eksport av varer. Verdien av olje og gass er ikkje med.
STOLT: Regiondirektør Jan Atle Stang i NHO.
Foto: Heidi Lise Bakke / NRK– Vi bør vere stolte
Regiondirektør Jan Atle Stang i NHO er ikkje overraska over at Sogn og Fjordane og Vestlandet kjem så godt ut.
– Dersom vi ser vekk frå heimstadadressa til hovudkontora så har vi innan fiskeri, oppdrett, teknologi og industri så stor verdiskaping at det ikkje er overraskande i det heile.
– Kan vi bruke denne rapporten til noko?
– Ja, ikkje minst kan vi vere litt stolte over det vi får til, at vi ikkje berre produserer og produserer utan at det viser igjen. Vi er faktisk ein viktig del av norsk næringsliv.
I tidlegare oversyn har Sogn og Fjordane kome dårlegare ut fordi produksjonen av t.d. aluminium i Årdal og Høyanger har sortert under Oslo, der hovudkontoret til Hydro ligg.
– Fylgjer for samferdslepolitikken
Det er Kommunal- og regionaldepartementet som har bede om rapporten, og statsråd Liv Signe Navarsete seier til Bergens Tidende at den syner kor store verdiar regionane utanom storbyane tilfører landet.
– Dette må få fylgjer mellom anna for samferdslepolitikken, seier ho.
Rapporten syner m.a. at Hordaland, Sogn og Fjordane og Møre og Romsdal står for halvparten av eksporten av norsk sjømat.