Det bles godt i fjellet torsdag morgon og fleire stader skaper vêret problem for bilistane. Riksveg 13 over Vikafjellet var vegen stengd grunna uvêr, men etter at vêret slo om torsdag morgon kunne vegen opne att like før klokka 07.
På fylkesveg 53 Årdal-Tyin er det torsdag morgon meldt om redusert sikt fleire plassar på grunn av snøfokk, vegen her kan bli stengd på kort varsel.
På fylkesveg 50 Hol-Aurland melder Statens vegvesen i 06-tida at det kan bli innført kolonnekøyring på kort varsel. Det er allereie problem med sikta her på grunn av snøfokk.
Ketil Molvær ved Vegtrafikksentralen i Lærdal seier ting fort kan endre seg på desse fjella.
– Det er nok dårleg vêr i vente her. Førebels er det fri ferdsle, men på Hol-Aurland kan det altså bli kolonnekøyring, og Tyin-Årdal kan bli stengd, seier han til NRK.no klokka 06.15.
Slik er stoda på vegane klokka 07.30:
- E16 Filefjell – snø- og isdekke. Klokka 05:45 var det -1 grad og svak vind og lette snøbyer
- Riksveg 13 Vikafjellet – opna etter å ha vore stengd grunna uvêr
- Riksveg 15 Strynefjellet – snø- og isdekke, redusert sikt. Klokka 04:30 var det -1 grad, laber bris, skya og snø
- Riksveg 52 Hemsedalsfjellet – snø- og isdekke. Klokka 05:30 var det 2 grader, stiv kuling og sluddbyer
- Fylkesveg 13 Gaularfjellet – vart vinterstengd onsdag
- Fylkesveg 50 Hol-Aurland – snø- og isdekke, somme stader redusert sikt på grunn av snøfokk. Kolonnekøyring kan bli innført på kort varsel. Klokka 05:30 var det 1 grad, frisk bris og snø.
- Fylkesveg 53 Årdal-Tyin – snø- og isdekke. Kan bli stengd på kort varsel. Klokka 05:30 var det -2 grader, laber bris og snøbyer
- Fylkesveg 60 Utvikfjellet – snøslaps og bart. Klokka 05.00 var det 2 grader, lett bris og sludd
- Fylkesveg 92 Bjordalen–Stordalen–stengd grunna oppryddingsarbeid
SJÅ OPPDATERTE TRAFIKKMELDINGAR HER
Is og slaps i vegbana fleire stader
Ein av dei som allereie har vore ute på vegane og har merka at ikkje alt er som det skal er Terje Solvang frå Innvik. På fylkesveg 60 mellom Olden og Innvik møtte han torsdag morgon på to isras.
– Det har gått isras på to plassar, like ved Tyvanestunnelen litt før Loen og like etter forsamlingshuset på Rake, seier han til NRK.no like før klokka 06.30.
Han oppmodar folk om å vere merksame på dette, for køyrer ein inn i isen kan bilen fort få store skader.
– Isen er like hard som stein. Det går fint å passere, men det er så store ismengder at om du møter bilar der kan du kome til å køyre inn i isen og øydelegge bilen sin, seier Solvang som ber folk vere forsiktige.
NRK har også fått melding frå ein bilist på E39 mellom Vadheim og Sande, der skal det ha gått eit sørpeskred ved Økslandvatnet. Det er om lag midt på vatnet at folk må vere obs, melder innringaren.