Norway Pelagic er størst i verda på mottak og eksport av sild og makrell. Verksemda har hovudkontor i Måløy med Domstein som storaksjonær.
- Det skjer som følgje av den strategiske utviklinga til Norway Pelagic. Vi ynskjer å bli større og ynskjer å satse på slike område som Emy Fish og Brødrene Myhre representerer; verksemder som lagar gode filetprodukt som har med framtida å gjere, seier administrerande direktør Gunnar Domstein i Norway Pelagic.
- Meir oversiktleg
Administrerande direktør i Norway Pelagic, Gunnar Domstein.
Konsernet meiner oppkjøpet er positivt fordi det gir sterkare marknadsposisjon og større kapasitet for råstoff. Domstein seier oppkjøpet gjer det det enklare å sikre seg gode prisar.
- Det har med utviklinga generelt i økonomien å gjere. Først og fremst at marknaden er blitt meir oversiktleg. Det vil seie det same som at du er nøydd til å ha ein større portefølje av produkt for å kunne vere ein aktør ute, seier Domstein.
43,5 millionar
Av børsmeldinga går det fram at Norway Pelagic må betale kring 43,5 millionar kroner for dei to verksemdene. Halva kan betalast gjennom aksjar. Det skal framleis pågå produksjon i lokala til Emy Fish og Brødrene Myhre etter oppkjøpet.
- Vi skal drive vidare dei to fabrikkane som i dag. Det er to lønsame verksemder som lagar gode produkt, så det er ingen grunn til noko anna, seier Domstein.
Kjem fleire
Oppkjøp og konsolidering med verksemder er noko Norway Pelagic har halde på med nokre år. Domstein utelukkar ikkje nye prosjekt i framtida.
- Vi arbeider kontinuerleg med slike prosessar og eg er overtydd over at det vil kome fleire, seier han.