Politiet har gjennomført rundspørjing i området, undersøking av åstaden og avhøyr, men har førebels ikkje kome noko nærare gjerningspersonane.
- LES OGSÅ: Eldre mann rana i sin eigen heim
– Det er eit mindre pengebeløp som er vekke, men alvorsgraden ligg ikkje i pengane. Det er innbrotet og det vi skildrar som ran som er alvorleg, seier lensmann Atle Førde.
Fleire har teke kontakt
Det var laurdag kveld eller natt til søndag at mannen i 70-åra fekk ubedne gjester på besøk. Gjerningsmennene tok seg inn i huset og skal ha slått han med ein gjenstand. Mannen bur åleine i huset.
Politiet har bede publikum om tips, og Førde fortel at dei har fått fleire henvendingar frå publikum.
– Det er ein del som har teke kontakt og som ynskjer å bringe vidare observasjonar, utan at det har ført oss noko vidare, seier han.
Måtte til lege
Politiet har sett av store ressursar i etterforskinga. Ranet vart oppdaga søndag føremiddag då heimesjukepleien fann eit glasfelt i døra knust.
Mannen måtte i etterkant til legeundersøking.
– Vi jobbar kontinuerleg med saka både her og i Balestrand, og brukar ressursar på etterforskinga i håp om at noko dukkar opp, seier Førde.