– Dette er slendrian, rasar Trygg Trafikk etter ti tilfelle av usikra barn i bil på kort tid

– Dette er rett og slett slendrian, seier ein svært oppgitt fylkessekretær i Trygg Trafikk Sogn og Fjordane, Audun Heggestad.

I samband med Aksjon skulestart har politiet gitt ti foreldre forenkla førelegg for manglande sikring av barn i bil. Det er i snitt eitt tilfelle kvar skuledag dei siste to vekene.

• Les også: – For mange sikrar ikkje barnet sitt i bil

– Ei billeg livsforsikring

Audun Heggestad i Trygg Trafikk er svært glad politiet set fokus på trygg skuleveg.

– Dette er veldig viktig, ikkje minst når ein ser kor mange reaksjonar politiet har gitt, seier han.

Av dei ti tilfella av usikra barn i bil som er oppdaga dei siste to vekene er det både små barn i bilsete og større barn som greier ta av og på seg belte sjølv. Heggestad meiner berre eitt tilfelle er eitt for mykje, og meiner ti tilfelle på så kort tid er svært urovekkjande.

– Vi har teljingar frå tidlegare der det har vore langt mellom dei usikra barna, spesielt på landevegen. Sikring av både vaksne og ungar med bilbelte er veldig viktig, og det er ei billeg livsforsikring, seier Heggestad.

• Les også: Enkelte stressar slik om morgonen at dei gløymer å feste ungane i bilen
• Les også: – Ikke la barna gjøre dette selv

– Dårleg tid og stress

Trafikkoordinator Trond Hatlenes i Sogn og Fjordane politidistrikt seier foreldre som har blitt stogga dei siste to vekene med usikra barn i bilen har forklart det med tidsklemma.

– Som oftast er det dårleg tid og stress som gjer at dei har gløymt det. Dei blir då oppmoda om å ta seg den tida det tek å sikre barna, og heller komme litt for seint enn å hamne i ei trafikkulukke med eit skadd barn, seier Hatlenes.

– Eg trur det er svært sjeldan at foreldre let vere å sikre ungane sine med vilje, legg han til.

Ber foreldre skjerpe seg

Men dårleg tid og stress er ikkje ei forklaring Audun Heggestad i Trygg Trafikk vil godta frå foreldra.

– Dette har vi høyrt også tidlegare. Usikra barn kan bli utsette for store skader, så dette er rett og slett omsorgssvikt og bør ikkje skje.

Han har ei klar oppmoding.

– Så mange sekund som dette tar må ein ta seg, slik at ein får sikra ungane sine skikkeleg.

• Les også: Festar bilbelte feil på barn i barnesete
• Les også: Skulebussar får køyre utan belte