Trur ikkje motstanden har minka

Klassekampen skriv i dag at motstanden mot kraftlinja i Hardanger er blitt mindre. Avisa skriv blant anna at AUF, ungdomsorganisasjonen til Arbeidarpartiet, har snudd i kraftlinjesaka.

– Klima er viktigast

I desember i fjor blei det gjort ei undersøking som viste at det var færre motstandarar enn nokre månader tidlegare.

Leiaren i AUF meiner klima er viktigare enn natur, når desse to forholda må setjast opp mot kvarandre.

– Dersom kablar i sjøen blir mykje dyrare enn kraftlinjer, må vi prioritera utbygging av fornybar energi, seier AUF-leiar Eskil Pedersen til avisa.

– Motstanden held seg oppe

Men ordføraren i Ulvik i Hardanger, Mona Hellesnes, avviser at motstanden har minka, sjølv etter ein periode med rekordhøge straumprisar og mykje fokus på det.

– Eg er uenig i det. Eg trur at motstanden fortsatt er stor, seier Hellesnes til NRK.

Les og: Vil spare strøm for å slippe master

Avventar ekspert-rapportar

Ordføraren legg til at ho har respekt for jobben som blir gjort av dei fire uavhengige ekspert-utvala og avventar rapportane deira. Desse utvala blei sett ned i august i fjor , og legg fram sine rapportar om sjøkabelalternativet på tysdag.

– Vil du godta dei konklusjonane som kjem på tysdag?

– Eg reknar ikkje med at den endelege konklusjonen kjem på tirsdag. Det kjem fire rapportar, og så blir det ei politisk avgjerd til sjuande og sist, seier Hellesnes.