Då Gunnar Iversen og ein kamerat flaug over Skåla i eit småfly fekk han sjå Skålatårnet og Skålabu i ei ny drakt.
– Det var utruleg mykje snø, seier Iversen.
Vinden hadde pakka det populære turmålet i Stryn inn i store mengder is og snø. For den som skulle ønske å ta seg inn i tårnet hadde det blitt ein stor jobb.
– Vi såg at det var umogleg å kome inn i tårnet, sjølv med spade hadde du blitt ståande i timevis, seier Iversen.
Piloten har fleire gongar vore på Skåla til fots og på ski, men har aldri sett tårnet i ei slik drakt. Denne gongen slapp han å sveitte under turen, sa han til avisa Fjordingen.
Isskulptur
– Det er rett og slett litt stilig å sjå. Men det er ei påminning om at det har vore tøffe forhold og framleis kan vere tøft der oppe, seier Per Arne Aadland, hyttedriftansvarlig i Bergen og Hordaland Turlag.
Aadland har ikkje lagt turen til Skåla i vinterhalvåret og vil heller ikkje tilrå å legge turen dit akkurat no. I deler av terrenget er det stor skredfare med bratte heng.
I tillegg er turmålet no blitt ein skulptur av snø og is.
– Du må belage deg på noko jobb før du kjem i hus i alle fall, ler Aadland.
Akkurat den jobben håper han no at vårsola skal ta brorparten av. Likevel reknar han med at det kjem til å stå att ein god del arbeid til dei første som kjem opp og skal inn i hyttene.
– Det vert ein bra jobb når våren kjem, legg han til.
Stor skredfare
NVE har sendt ut farevarsel om stor skredfare i fire regionar på Vestlandet.
På Voss, Hardanger, Sunnmøre og i Indre Fjordane, der Skåla ruvar med 1848 høgdemeter.
Årsaka er at vêret skal ta seg opp det komande døgnet.
– I fjellet forventar vi at det vert danna store fokksnøflak i le område som kan losne naturleg, seier Emma Julseth Barfod, vaktleiar i snøskredvarslinga.
Ho ber turgåarar halde seg unna skredterreng.