Medan Terje Ness tente mest i 2010, er det kompisen Ole Jonny Eikefjord som har overteke trona blant kjendisane frå fylket.
Det viser oversikta frå skatteetaten for inntektsåret 2011, som var publisert i natt.
Eikefjord er styrer fire restaurantar, Eik Annen Etage, Eik Bella Bambina, Eik Fjord og Eik Savoy. I tillegg eig han Eikefjord Invest. Investeringsselskapet gjekk i fjor med 1,2 millionar i overskot før skatt.
Sjølv noterte Eikefjord seg for ei skattbar inntekt på 2,8 millionar kroner.
Kan meir enn langrenn
Skatteoppgjeret viser at glopparen Odd-Bjørn Hjelmeset kan meir enn å gå fort på ski. Saman med kona driv han verksemda Bdo Foretaksservice, som i fjor gjekk nær tre millionar kroner i pluss før skatt.
Verksemda driv marknadsføring og sal av tenester innan sport og fritid. Dei driv også med føredragsverksemd og skiskular. Hjelmeset har også ei rekkje styreverv.
I år som i fjor kjem Sogndal-artisten Tone Damli Aaberge på tredjeplass på lista.