Trur likevel på ein fantastisk sesong

Østerbø fjellstove ligg 820 meter over havet, og er ein av dei største og mest populære overnattingsstadene blant fjellfolk i fylket.

• LES OGSÅ: Færre norske til Briksdalsbreen
• LES OGSÅ: Turistane svikar musea

I år har dei ikkje hatt så mange besøkjande som dei skulle ønskje.

Stillare enn normalt

– Sesongen har vore litt stillare enn den pleier i juni og juli. Det er ikkje den store nedgangen, men folk sit og ventar og ser veldig mykje på Yr, seier dagleg leiar ved Østerbø fjellstove, Nina Sønsteng.

På same som måte som ved Briksdalsbreen i Olden har ikkje den norske fellesferien vore heilt på høgde med tidlegare år for fjellstova.

– Det er det same her, men det er ikkje den store forskjellen. Likevel drøymer vi jo alltid om ei auke, og det har vi ikkje fått dei to første månadene. Men vi har veldig mykje i august og september, så sesongen under eitt skal nok bli fantastisk, seier Sønsteng.

Djupe røter

Østerbø fjellstove har ei lang historie bak seg, med røter heilt tilbake til 1600-talet. Det speglar seg i interiøret, som blant anna består av utstoppa dyr som bjørn, jerv, ørn, og til og med ein isbjørn. På stolane kan turistane lese folkeeventyr av Asbjørnsen og Moe.

– På 1600-talet var det to gardar her oppe, og etterkvart vart det utvikla til støl og dei begynte å ta imot gjestar som kom vandrande over fjellet, fortel Sønsteng.

(Artikkelen held fram under biletet)

Ho har jobba som dagleg leiar i 19 år, og utviklinga har vore enorm. Men det har vore viktig for Østerbø fjellstove å ta vare på historia og dei gamle tradisjonane.

– Det har vore ei fantastisk utvikling, og det har vore kjempemoro. Det starta med nokre få hus her oppe, med rom med turisthyttestandard. Så har vi bygd på mykje, og vi har no alle fasilitetar, alt frå hotellavdeling, leilegheiter, hytter, fjellstoverom og ein flott campingplass, seier Sønsteng.

– No har vi alt vi kan tilby, men samstundes har vi prøvd å integrere alt det gamle inn i bygningane våre. Vi er opptekne av å ta vare på gamle tradisjonar, seier ho.