Ingen har kartlagt omfanget av stoffet, men Statens Legemiddelverk meiner fleire tusen nordmenn brukar det. Mange unge sprøyter stoffet melanotan inn i kroppen for å bli brun og tynn.
Barbiedop
Therese og Julia har sett venninner teste ut melanotan, eller barbiedop som det vert kalla. Dei trur mange let seg freiste av stoffet.
- Me kjenner jenter som har vorte lagt inn på sjukehus. Det slår ofte feil.
Lett å få tak i
Det er lett å bestille melanotan over internett. Eit kjapt søk får opp fleire titals seljarar, både norske privatpersonar og bedrifter registert i utlandet.
Pulveret blandast ut med vatn og sprøytast inn i kroppen. Men melanotan er ikkje eit godkjent legemiddel i Noreg, og det som dumpar ned i postkassa kan vere direkte farleg.
- Dette skal ein halde seg vekke frå. Stoffet har no vorte populært, det er mykje pengar å tene på det og da er kjem veldig mange useriøse aktørar på marknaden, seier overlege Steinar Madsen ved Statens legemiddelverk.
Alvorlege biverknader
Jan Schjøtt, seksjonsoverlege ved seksjon for farmakologi ved Haukeland sjukehus i Bergen, understrekar kor farleg det kan vere å kjøpe barbiedop på nettet.
- Me har sett tilfeller der ein har sprøyta dette stoffet inn i huda og fått alvorlege og til dels livstrugande infeksjon. Det er ein risikosport å bestille dette over nettet når ein ikkje kan kontrollere kvaliteten.