Oljenæringa i Florø har lenge ynskt betre samband med oljehovudstaden Stavanger. Frå før har kystbyen samband med både Bergen og Oslo.
Ruta gjer det lettare å komme seg til Austlandet, men blir spesielt viktig for oljeverksemda i byen.
– Med denne flyruta blir det lettare å kunne samhandle desse byane imellom. I Stavanger er det store miljø som vil vere ein kjempefordel for Florø og resten av Sogn og Fjordane å knyte seg tettare opp mot, meiner Flora-ordførar Bengt Solheim-Olsen (H).
Oljesenter i fylket
Kystbyen har sidan 1980-talet vore "oljebyen" i Sogn og Fjordane, med fylkets einaste oljebase på Botnaneset. I 2010 opna Statoil eitt av dei største logistikksentra for røyr i Europa på Fjord Base. Aktiviteten til Statoil, som har sitt hovudsete i Stavanger, genererte det året kring 400 arbeidsplassar i Florø. Frå flyplassen går det også helikoptertrafikk til Nordsjøen.
Solheim-Olsen seier det er først og fremst oljenæringa i byen som vil tene på den nye flyruta.
– Det er spesielt i den petroleumsretta næringa vi håpar vi kan få sjå positive ringverknader, men eg trur det også kan bli lettare å få framtidige etableringar i vårt fylke, seier han.
Kristiansund neste
Solheim-Olsen håpar flyrute til ein annan oljeby, Kristiansund, kan bli den neste positive utviklinga for flytilbodet frå Florø.
Staten vil ikkje gje konsesjon på ei slik rute i denne omgang. Solheim Olsen trur ei slik rute eventuelt må bli ei kommersiell rute som den til Stavanger og vidare til Skien.
– Det er samtalar på gang, men det vil neppe skje noko i næraste framtid. I alle moglegheiter vi får, så spelar vi inn det ynskjet, seier han.