Raset i Romarheimsdalen og brann i Masfjordtunnelen stengde hovudfartsåra mellom Førde og Bergen, og det vart lange køar og mykje venting for bilistane.
Saknar informasjon
Torbjørn Gjertsen køyrde frå Oppedal heilt til Masfjorden utan at det vart varsla at vegen der var stengt. Ein brann i ein bubil stengde Masfjordtunnelen søndag kveld.
Dermed måtte han snu og køyre tilbake mot Gulen.
- Eg synest det er rart at vi ikkje fekk noko informasjon, seier han.
- Dei kunne godt gjeve beskjed om at det var brann i tunnellen. Då kunne eg spart ein halv time i omveg fordi eg måtte køyre tilbake igjen, seier han.
Gunnar Kraakenes, sjefsingeniør i Statens Vegvesen seier omkøyring var skilta både på Kringla og i Instefjord.
Opnar tidlegast i ettermiddag
E39 gjennom Romarheimsdalen er framleis stengt etter raset som gjekk laurdag, og vert tidlegast opna i løpet av ettermiddagen.
Vegvesenet rår køyrande til Bergen til å køyre riksveg 57 og ta ferja mellom Leirvåg og Sløvåg.
Masfjordtunnelen er igjen opna, men er delevis mørkelagt etter brannen i bubilen.