Tidlegare har både Aalesund (2011) og Hødd (2012) slått TMFK i dei innleiande rundane i norgesmeisterskapen i fotball. I kveld var det Sogndal sin tur til å prøve seg mot 3. divisjonslaget frå Nordfjord.
– Lett var det ikkje, vi gjorde to mål i starten av kampen som var viktige for oss. Det var litt ekkelt i byrjinga med vinden, særleg når dei hadde medvind og skapte nokre sjansar. Men det er klart, seinare i kampen styrer vi det meste, fortel Sogndal-trenar Jonas Olsson etter kampen.
Sjå video: Oppsumering av 1.omgang mellom Tornado Måløy og Sogndal. (Foto/redigering: Ole Andre Rekkedal)
Espen Næss Lund, Ulrik Flo og Azar Karadas sørga for 0-4 i målprotokollen for eliteserielaget frå Sogn. Målskårar Flo var særs nøgd etter cuprunden.
– Vårt mål var berre å drepe kampen og ikkje gje dei noko håp. Vi skulle ta kommando frå start og få eit par kjappe mål, og det gjorde vi. Derifrå synes eg vi kontrollerar det greitt inn.
Sjå video: Oppsumering av 2.omgang mellom Tornado Måløy og Sogndal. (Foto/redigering: Ole Andre Rekkedal)
– Statistikken syner at dei som vinn mot Tornado endar opp med siger på Ullevaal. Kva tenker du om det?
– Det er fullt mogleg det! meiner Flo.
Sogndal sin svenske trenar, Jonas Olsson, kjenner til den gode statistikken, men er litt mindre bombastisk i si tru på cupfinale til hausten.
– Vi får håpe at han har rett. Det er vår ambisjon om å kome dit. Det er ein vanskeleg veg dit, men vi har lagt bak oss eit vanskeleg hinder her, sler Olsson fast.