Skog er i ferd med å ta over store delar av fjellheimen i Sør-Norge. Tregrensa kryp stadig oppover mange stader. Der du før hadde flott utsikt, har trestammene overteke.
Werner Hafstad er strekningsansvarleg for Gamle Strynefjellsvegen, Sognefjellet og Valdresflya i prosjektet Nasjonale turistvegar. Han seier det er viktig å ha utsyn over landskap rundt turistvegar.
– Attgroing er eit generelt problem på mange strekningar i Norge. Vi brukar ein del pengar på det vi kallar utsiktsrydding der det er viktig å få utsyn til fjord, foss eller fjell.
Kan bli kritisk
Han seier det blir kritisk om heile landskapet må haldast nede. Så langt har høgfjellsovergangar blitt sparte for grov vegetasjon.
– Men vi ser no at både på Valdresflya og Hardangervidda at vegetasjonen kryp oppover, seier han.
Direktoratet for naturforvalting i Trondheim gir klimaendringar skulda for at tregrensa kryp oppover og fryktar for fleire artar.
– Vi har truleg berre sett starten på klimaendringane. Nå vi ser utbreiing av skog over mykje større område i høgda, vil det få konsekvensar for naturtypar i desse områda, seier seksjonssjef Gunn Paulsen i Direktoratet for naturforvaltning.
Hardangervidda kan bli Hardangerskogen
Framleis har vi store opne fjellandskap i Sør-Norge, men forskarane spår veldige endringar.
– Dette skjer over heile landet. Hardangervidda held på å bli Hardangerskogen. Det tykkjer eg er heilt forferdeleg, seier biolog Tanaquil Enzenberger.
Werner Hafstad i dei nasjonale turistvegane seier det må brukast meir pengar dersom Norge skal seljast på same måte i framtida.
– Det må bli ein verdidebatt rundt det. Kva er det vi ønskjer å vise fram, spør han.
SJÅ TV-SAKA: Tregrensa kryp stadig oppover i høgda.