Snøskred ved skisenter – kvinne frakta til sjukehus

Det var klokka 11.37 at skredet vart meldt inn.

To personar vart tatt og ein tredje person var vitne til skredet, som har gått i området like aust for dei preparerte løypene.

– Ut frå dei opplysingane me har, trur me ikkje at det er fleire personar som vart tatt. Men me sender ressursar inn i området for å stadfesta er at ingen andre er i skredet, seier Helge Blindheim, operasjonsleiar i politiet til NRK litt etter klokka 12 søndag.

Klokka 14.43 melde politiet at søket er avslutta, utan å finna fleire personar. Det er heller ingen personar som er sakna.

Skredet skal vera mellom 20 og 30 meter breitt og 50 meter langt, ifølgje vitne.

– Den første meldinga gjekk ut på at det var to personar som var sakna, men me fekk ganske kjapt kontroll på at desse var ute av skredet, seier Blindheim.

Den andre personen som vart tatt, ein mann i 50-åra, blir teken hand om av Røde kors, men skal vera uskadd.

Det er betydeleg snøskredfare på heile Vestlandet. Det er komplekse forhold og vedvarande svake lag nede i snøen.