For mange stader går det no ei kraftig omgangssjuke. Her får du gode råd om korleis du kan halde deg frisk.
Overlege ved mikrobiologisk avdeling i Helse Førde, Reidar Hjetland, seier han har høyrt at mange er sjuke.
- Vanlegvis er det snakk om eit virus som heiter Noro som fører til oppkast og diare. Sjuka varer vanlegvis frå ein til to dagar og då er det berre å halde senga.
Vask hendene!
Viruset smittar veldig lett frå person til person og det er lett å få smitte på hendene.
- Vask hendene støtt og stadig. Og her har ikkje handspriten noko fortrinn framfor god, gammaldags handsvask. Ved dette viruset er det slik at god vask er like greitt som sprit.
- Kor tid er folk smittefarlege?
- Dei er smitteberande i to døger etter at dei har blitt friske, men er sjølvsagt mest smittefarlege når dei er sjuke.
Drikk nok
Hjetland seier at ein ikkje blir immune etter å ha gjennomgått spysjuka.
- I beste fall er det kortvarig, så du kan bli sjuk gong på gong.
Og Hjetland har eit råd når du ligg der og er skikkeleg dårleg.
- Få i deg nok drikke. Dette er veldig viktig dersom du har diare og oppkast.