I dag presenterte NAV ferske tal for sjukefråvær i første kvartal for 2012.
Innan helse- og sosialsektoren har det tradisjonelt sett vore høgt sjukefråvær, ei trend som held stand også i år.
I fylket går det totale legemelde sjukefråveret innan sektoren ned 3,6 prosent samanlikna med same periode i fjor.
- Sjå alle kommunane i fylket nedst i saka
Dobla fråvær
Men i Balestrand er stoda ei heilt anna enn nedgang. I kommunen har sjukefråveret i helse- og sosialsektoren gått opp med heile 104,5 prosent, eller over ei dobling i forhold til same periode i fjor.
Både Aurland og Askvoll har også fått ein oppsving i talet på fråveretimar, med ei auke på høvesvis 61 prosent og 71,4 prosent.
Resultatet for kommunane sprikar. Medan det i Balestrand har dobla seg, har det i Årdal gått klårt den andre vegen. Der har det hatt ein nedgang på 37 prosent samanlikna med same periode i fjor.
Ligg godt under målsettingen
– Det er kjempeflott med ein slik nedgang, er den første reaksjonen til personalleiaren i kommunen, Elin Heen.
– Me jobbar heile tida med oppfølging av sjukefråvær, og me har sett oss ei målsetjing om å ligga under sju prosent sjukefråvær. Førebels ser det ut til at me klarar å halda oss under det med god margin, og det er me sjølvsagt godt nøgde med.
I fylgje Heen har Årdal kommune arbeidd systematisk med oppfølging av dei tilsette.
– Me har blant anna gjort grep i eldreomsorga, der me har omplassert tilsette og funne andre oppgåver til dei som passar dei betre, seier ho.
Andre kommunar som også har hatt ei utvikling i rett retning, er Flora kommune med nesten 26 prosent nedgang, Vik med 27 prosent og Luster med 28 prosent.
