Sju gutar møtte opp med stein i lommene på Sian-demonstrasjon

Laurdag klokka 13 starta den islamfiendtlege gruppa Sian sin demonstrasjon på plassen utanfor tingretten i Bergen.

Politiet anslår at kring 150 motdemonstrantar har møtt opp. Innsatsleiar John Endre Skeie trur trusselnivået vil vera lågt.

– Me har tru på at dei som har kome og meldt motdemonstrasjon, skal gjera dette verbalt og med lovlege midlar, seier han.

Likevel har politiet teke sju unge gutar med stein i lommene.

– Dei steinane har me teke frå dei, og dei er viste bort, seier Skeie.

Ein annan demonstrant er også vist bort. Eitt lydanlegg er teke frå motdemonstrantane.

I fjor enda ein Sian-demonstrasjon på Festplassen i dramatikk. Leiaren av gruppa vart slått ned.

Politiet vil ikkje seia kor mange politifolk som er på Tårnplass laurdag, men iallfall 35 står føremiddag inne på plassen framfor tingretten.

Betongelement og franske gjerde er sett inn for å skilja Sian og motdemonstrantane.

Vald og tåregass i fjor

24 personar vart meldt til politiet etter demonstrasjonen i fjor. Sju av dei, alle menn over 18 år, fekk mellom 12.000 og 17.000 kroner i førelegg for ordensforstyrringar.

Motdemonstrantar hoppa over sperringane politiet hadde sett ut. Politiet brukte tåregass mot motdemonstrantane.

Etter Sian hadde fjerna seg frå Festplassen, samla kring 200 personar seg ved politihuset i Bergen. Politiet valde å omringa politihuset.

I etterkant slo politiet alarm om at unge hadde mista respekten for dei.

– Me blir framstilt som ein veldig valdeleg etat som ikkje er på lag med innbyggjarane, og som diskriminerer enkelte folke- og aldersgrupper, sa driftseiningsleiar Morten Ørn til politiet den gong.

Avstengd Tårnplass

BT kunne tidlegare denne veka skriva at politiet hadde sendt ut brev til fleire rektorar i Bergen, der dei bad dei «lodda stemninga», for å finna ut kor mange som hadde tenkt seg på demonstrasjonen. Politiet bad også skulane om å gjera elevane bevisste på ytringsfridomen og politiet si rolle.

– Me skal overhovudet ikkje «lodda stemninga» for politiet, sa nestleiar i Utdanningsforbundet i Bergen, Eirik Lilleheil, til avisa.

BT kunne også melda at dei fire bedriftene på bakkeplan på Tårnplassen, valde å stengja dørene laurdag. Etestaden Plassen rekna med å tapa ei omsetning på 50.000 kroner.

Instagram-kontoen til Vest politidistrikt publiserte torsdag ein video om ytringsfridom og demonstrasjonar. Tidlegare i september diskuterte politimeister Kaare Songstad fjorårets Sian-demonstrasjon, ytringsfridom og politiet sin rolle under ei økt basketball med Marco Elsafadi.