– Vi var på veg frå Voss til Vik då vi møtte traileren som blokkerte vegen, fortel Arnfinn Halrynjo.
Ved Ygnisdalen på Vikafjellet sklei eit utanlandsk vogntog av vegen i ettermiddag.
– Det står bom fast, seier Halrynjo.
Han fortel om ein såpeglatt fjellovergang.
– Det er så glatt at det er vanskeleg å gå på beina. Det er ikkje is, men polert snø og ser dermed ikkje så glatt ut. Folk må vere forsiktige, seier han.
GLATT: – Det er så glatt at det er vanskeleg å gå på beina. Folk må vere forsiktige, seier Arnfinn Halrynjo.
Foto: Arnfinn HalrynjoBergingsbilar på veg
Ein personbil har også køyrd i vogntoget. Halrynjo fortel at bilen ikkje hadde sjanse å stoppe, og måtte bruke autovernet til å bremse.
To bilbergarar frå Voss måtte kome til unnsetning for å berge både vogntoget og personbilen.
No blokkerer vogntoget heile vegen, og vegtrafikksentralen veit ikkje kor lenge fjellet vil vere stengt.
– Det er ikkje godt å seie kor lang tid det vil ta før vegen blir opna, seier trafikkoperatør Nina Heggernes.
Klokka 19.15 melder vegtrafikksentralen at fjellovergangen er opna.
Enda i grøfta
Det er ikkje berre Vikafjellet som har utfordrande køyreforhold. I går enda ein trailer i grøfta på rv. 52 Hemsedalsfjellet.
Då fekk 110 Vest meldingar om at det var svært glatt på staden, og oppmoda bilistar om å køyre varsamt.
– Bør sjåførar bruke kjetting over fjella no?
– Har du gode dekk og køyrer forsiktig skal det gå greitt. Det er ikkje godt å vite kor gode dekk utanlandske køyretøy har, seier trafikkoperatøren, som understrekar at gjeld det å køyre etter forholda og sko seg godt.
I GRØFTA: Turen over Hemsedalsfjellet torsdag enda i grøfta for sjåføren av dette vogntoget.
Foto: PrivatMed unntak av stadane det blir utført vedlikehaldsarbeid er det per no berre Vikafjellet som er strengt. Her held du deg oppdatert på fjellovergangane.
