Rasar mot sognekunst i Bergen

– Dessutan er det farleg støy, med desibel som er såpass høg at folk kan få skader av det. Grensa er nådd, slår Oddekalv fast overfor BA.no.

Vevring-kunst er festspel-lyd

Kunstnaren Geir Hjetland frå Balestrand sin store mobile megafon, kalla «Desibel», har skapt overskrifter i Bergens-pressa.

Lyd-kunstverket som vart laga som ein protest mot gruveplanane i Engebøfjellet under fjorårets Vevringutstilling, er laga på Kvamsøy i Sogn, men fekk sin elddåp i Sunnfjord i september i fjor. No er den nytta som kunstinstallasjon under dei pågåande Festspillene i Bergen.

128 desibel

Den store megafonen, eller «hornhøytaleren» som BA.no har døypt kunstverket, fekk æra av å avslutte onsdagens festspelopning med protestsong frå Vågen.

Med ein lyd på 128db på inntil 10 meter, let megafonen seg absolutt høyre. Det har fått Kurt Oddekalv i Miljøvernforbundet til å sjå raudt.

• SJÅ NETT-TV OG HØYR LYDEN:
  Megafonen under fjorårets Vevringutstilling

– Eg synest det rett og slett er pinleg med dette prosjektet. Det har ingenting med Festspillene å gjere. Dette er lydforureining av verste slag, seier Oddekalv til BA.no.

«Nyttar ikkje å kamunflere gutestrekar som kunst»

Han samanliknar kunstverket med motorsyklistar som køyrer Harley Davidson utan eksosanlegg.

– Det er ikkje spesielt sexy. Det nyttar ikkje å kamunflere gutestrekar som kunst.

Etter planen skal megafonen gi lyd frå seg tre gongar dagleg under Festspillene. Oddekalv trugar med politimelding dersom «støyen» held fram.

– Skal dei halde fram med dette kvar dag vil eg bruke min rett til å protestere og forlange at det blir stoppa. Blir ikkje dette stoppa, vil eg melde dei, seier han og viser til forureiningslova.

Ok i Sunnfjord, men i Bergen...

Oddekalv har sjølv profilert seg som mostandar av gruveplanane i Sunnfjord, som var utgangspunkt for kunsten. Å bruke den i Vevring var ifølgje miljøkrigaren heilt greitt, men i Bergen vil han ikkje høyre megafonen.

– Når Festspilldirektøren brukar dette som såkalla kunst, då har han misforstått og bør pakke snippeska si. Det er muleg eg er ein sur, grinete, gammal gubbe, men eg synest dette er utroleg lite kreativt.

Lyden frå megafonen skulle ifølgje gruvemostandarane vise støybilete som vil bli i bygda ved Førdefjorden, dersom gruvdrift blir realisert.

Det har så langt ikkje lykkast NRK å få kommentar frå kunstnaren og Festspillene i Bergen.