I ein annonse på internett reklamerer to utanlandske prostituerte med at dei kjem til Sogn og Fjordane denne helga.
Camilla Hammergren, fagkonsulent for pro- senteret, støttesenteret for prostituerte, meiner dette blir meir vanleg framover.
- Det å reise ut i distrikta vil kanskje løne seg uansett, fordi det er ein udekka marknad der.
Utanlandske damer
Hammergren slår fast at dei prostituerte tener mindre i Oslo no enn før. Det fører til at flere vel å reise ut i distrikta.
NRK veit om to kvinner som kjem til Sogn og Fjordane i løpet av veka for å tilby seksuelle tenester.
Besøkte Sunnfjord Hotell
I utgangspunktet er prostitusjon lovleg , men det er straffbart å tene penger på andres prostitusjon. Damene tilbyr kundane å kome til hotellet dei bur på, og det er difor problematisk kva slags hotell dei vel å bu på.
Etter det NRK kjenner til skal kvinner som tilbyr seksuelle tenester i sommer ha budd på Rica Sunnfjord hotell i Førde. Det er noko direktør Odd Erik Gullaksen stiller seg helt uforståande til.
- Dette er heilt ukjent for oss. Vi har verken observert, vorte tipsa eller vorte fortalt om dette.
- Vil vere på vakt
- Kva vil du gjere for at dette ikkje skal skje igjen?
- Vi vil halde auge og øyre opne og gjere det beste vi kan. Det kan og vere aktuelt å tipse politiet om at det er slik aktivitet på veg til Førde. Vi vil ikkje ha slik aktivitet hos oss, og vi kjem til å reagere kraftig om det skulle skje.
Ukjent for politiet
Også lensmannen i Førde, Kjell Fonn reagerer då han får høyre at det kjem reisende prostituerte til Sogn og Fjordane.
- Vi vil ta kontakt med dei ulike overnattingsstadene og gjere dei merksame på at dei kan verte oppsøkte av prostituerte.
Ber om tips
Lensmannskontoret i Førde har ikke kapasitet til å følgje med på kva som rører seg på internett. Sidan reklameringen for reisande prostituerte i stor grad skjer på nettet ber politiet publikum om hjelp.
- Vi er avhengige av at folk tipsar oss om denne typen trafikk.