I helga vart han overrekt Hilmar Alexandersen musikkpris for 2013 under Hilmarfestivalen i Steinkjer.
Prisen er på 10.000 kroner og heng høgt i folkemusikkmiljøet.
– Når du ser namna du står saman med blant tidlegare vinnarar, så er det veldig stas, seier Arne Sølvberg.
Nordfjord – igjen
Prisen har vore delt ut 15 gonger før og har gått til namn som Annbjørg Lien, Knut Buen, Majorstuen, Hans Brimi og Sven Nyhus.
Og i år var det Sigrid Moldestad frå Gloppen som heldt takkekonsert som fjorårets vinnar.
– Det må vere heilt spesielt og ei fjør i hatten for folkemusikkmiljøet at nordfjordingar har fått den to år på rad, meiner Sølvberg.
– Uvanleg dyktig
Hilmar Alexandersen vart sett på som ein av Trøndelag sine store kunstnarar, anerkjend både nasjonalt og Nordisk. Sølvberg fekk sjølv gleda av å møte og oppleve folkemusikaren.
I grunngjevinga trekkjer juryen fram Sølvberg som ein av landets aller fremste og mest allsidige folkemusikar og folkedansar.
– Han er uvanleg dyktig utøvar på både vanleg fele og hardingfele – og også trefløyte/tussefløyte, og er ein av få som er A-klasse-spelmann både på hardingfele og vanleg fele, skriv juryen.
Kona Asbjørg
Sølvberg vann i 1989 Landskappleiken på vanleg fele, og i Landskappleiken i dans i 2004 saman med kona Asbjørg.
Han har gjeve ut sju eigne plater og delteke på ei lang rekkje fleire, og har turnert både i Norge, Europa og USA.
- LES OGSÅ:
- LES OGSÅ:
– Eg er veldig glad for at Asbjørg vart nemnd i talen til fylkesordføraren i Trøndelag. Hadde det ikkje vore for ho, så kunne eg aldri vore så engasjert i folkemusikken, seier Sølvberg.
Vart imponert sjølv
Vidare vart Sølvberg sine mange verv i folkemusikk og folkedans trekt fram, samt mange av prisane han allereie har sikra seg.
Som til dømes Spellemannsprisen i 1996 for soloplata «Nordfjordslåttar» og Kongens fortenestemedalje i 2010.
– Eg tykte det vart mest som ein einaste skrytetale. Eg må innrømme at eg vart mest imponert der eg sat i salen, men så har eg også levd eit rikt liv grunna folkedansen, seier Sølvberg.
Æresmedlem
I fjor vart stryningen tildelt heidersmedlemsskapen i folkemusikkorganisasjonen FolkOrg. Dermed byrjar lista over aktuelle prisar å krympe.
– Ja, det har vore storveges siste åra. Kanskje det er eit alderdomsteikn, humrar Sølvberg og held fram:
– Æresmedlemskapen er nok noko av det høgste for min del og Kongens fortenestemedalje då eg var 60.
Lokal heider og ære
– Kanskje det aller kjekkaste er å få heider og ære lokalt. Å bli sett pris på av eigne bygdefolk, seier han og legg til at Stryn kommune var tidleg ute med å tildele han kulturprisen.
– Spellemannsprisen var ei oppleving å få, men den har eg fått ein gong slik at det er greitt. Nei, eg har ikkje noko meir prisar no som står på ynskjelista, avsluttar Sølvberg.