Naturskadevurderingane etter Dagmar tok i fjor beslag på opp mot to av Sogn og Fjordane politidistrikt sine årsverk.
I alt handsama politiet 554 naturskadesaker i fjor. 500 fleire saker enn snittet for dei fem føregåande åra.
– Dette er ei oppgåve som lensmannen er pålagd i dag, og ei oppgåve som eg heilt klart meiner at andre kan handtere slik at vi får frigjort den kapasiteten til politigjeremål, seier politimeister Johan Brekke.
Opp til to årsverk
I ein allereie hardt pressa bemanningssituasjon er politimeisteren lei av å bruke ressursar på det han meiner ikkje er politiarbeid.
(Artikkelen held fram under biletet)
Dagmar gjorde på landsbasis skade for 60 millionar kroner på skog. Private forsikringsselskap måtte punge ut 1,3 milliardar kroner i forsikringsoppgjer etter stormen.
– Utan å ha noko heilt eksakt tal på det for 2012, så brukte vi mellom halvanna og to årsverk på naturskjønn i kjølvatnet av naturhendinga, seier Brekke.
– Nedprioritere etterforsking
Lensmann Tormod Hvattum i Vågsøy var ein lensmennene som måtte bruke mykje av tida si på å vurdere naturskadar.
– I Nordfjord har det til saman resultert i 350 naturskadar som har oppteke nesten all tida til oss fem lensmennene i Nordfjord i tida som har gått etter 25. juli, fortalde han til NRK.no i mai.
– Det er iallfall eit så stort inngrep i arbeidstida vår at vi har hatt lite tid til å prioritere andre ting, la han til.
Ap ser på ordninga
Og no kan bøna frå politimeister Brekke vere høyrd. For tidlegare medlem i justiskomiteen, stortingsrepresentant Ingrid Heggø (Ap), seier at dersom dei får det som dei vil, så kan Brekke sleppe å tenkje på naturskadeskjønn i framtida.
– Det blir sett på å ta det vekk frå politiet, av den enkle grunn å frigjere meir politiressursar. Det gjeld ikkje berre det arbeidet, men også andre ting som dei gjer i dag og som har lite med politiarbeid å gjere, seier ho.
Men kven som då skal få jobben, er uvisst.
– Det har vore vurdert fleire, men ein treng ikkje vere politiutdanna for å setje ein takst, avsluttar ho.