Mannen, som opphavleg er frå Noreg, døydde i regionen Jinja i Uganda tidlegare denne månaden.
Han blei frakta til eit medisinsk senter 10. mars av kjærasten og venen, som no er arresterte og mistenkte i samband med dødsfallet. Det går fram i ei pressemelding frå ugandisk politi.
Politiet meiner dei to har prøvd å iscenesetta drapet som sjølvmord. Kjærasten til venen er også etterlyst, ifølgje politiet. Dei fire skal ha budd saman i ein bustad.
Henta inn bevis fleire stader
Mannen er opphavleg frå Bergen, men har budd i Uganda den siste tida. Han har også vore busett i Kristiansand.
Ifølgje ugandisk politi er det gjort undersøkingar i bustaden til nordmannen og dei arresterte. Det skal ha blitt henta inn bevis og gjort avhøyr både der og på det medisinske senteret han blei frakta til.
– Motivet for drapet vil bli fastslått i løpet av etterforskinga, ifølgje James Mubi, som er talsperson for politiet i Jinja.
Dei to mistenkte er varetektsfengsla til 31. mars, då dei skal møta i retten igjen, opplyser politiet.
Kripos opplyser til NRK at dei ikkje har noko rolle i denne saka, og viser til ugandisk politi.
Kripos har førebels ikkje fått spørsmål om å medverke i etterforskinga.
Foto: Petter Larsson / NRKEtterlatne i Noreg
NRK har vore i kontakt med dei etterlatne i Noreg, og dei er informerte om at saka blir omtala. Dei har tidlegare fått obduksjonsrapporten frå politiet i Bergen. NRK har også lese rapporten.
Den viser til at dødsårsaka er kveling. Ifølgje rapporten har mannen også verjeskadar, som kan bety at han har forsøkt å gjera motstand.
I tillegg er mannen, ifølgje obduksjonsrapporten, påført fleire andre ikkje-livstruande skadar.
– Obduksjonsrapporten stadfestar vårt verste mareritt, sa søstera til mannen til NRK før drapsetterforsking var stadfesta av ugandisk politi.