Samarbeidsutvalet i Sogn og Fjordane politidistrikt kom tysdag til semje om å organisere distriktet i tre nye, store driftseiningar.
Det skriv Firda onsdag.
1. januar 2011
– Tre personar vil sitje med totalansvaret overfor politimeisteren, mot 23 i dag. Det frigjer ressursar, seier politimeister Johan Brekke til avisa.
Endringane skal vonaleg tre i kraft frå 1. januar 2011 og har som mål å flytte ressursar som i dag blir nytta til administrasjon, til meir effektiv polititeneste.
Overfor NRK Sogn og Fjordane presiserer Brekke at dagens lensmannskontor vil halde fram som før.
– Det vi gjer er å få ei anna organisering av ressursane som då blir organisert i tre driftseiningar eller område, som får ansvaret for det administrative opp mot politimeisteren. Men lensmannsditrikta, dei består. Lensmannen vil halde fram med å vere på det kontoret han er på, og held fram med sine oppgåver.
Uvisst kvar leiinga skal sitje
Kvar dei dei tre nye politieiningane, Nordfjord, stor-Sunnfjord (inkl. Ytre Sogn) og Indre Sogn skal leiast frå, er framleis ikkje avklara. Men, i ein invitasjon til eit møte med kommunane i mai, skriv Brekke at at region stor-Sunnfjord skal leiast frå Førde.
Fellesforbundet snur
Politiets Fellesforbund har tidlegare kravd åtte driftseiningar. Dei har no snudd i saka.
– Vi ser at organisasjonen er tungrodd og at noko må skje, seier Einar Vereide, fungerande leiar i Politiets Fellesforbund i Sogn og Fjordane, til Firda.