For andre gong på eit halvt år står denne familien utan barnehage

Oline (2) hadde berre så vidt starta i private Fjellheim Fus friluftsbarnehage då sjokkmeldinga kom i slutten av januar.

Den populære friluftsbarnehagen med plass til 44 barn vert lagt ned til sommaren.

Grunnen er dårleg økonomi, ifølgje kjeda sjølv.

Og fleire barnehagar står no i fare, ifølgje Monica Johnsen i Fus-barnehagane.

Årsaka er låge tilskot, hevdar dei. Kjeda driv 184 barnehagar over heile Noreg.

Barnehagepolitisk talsmann i Frp, Himanshu Gulati, meiner det som skjer på Fitjar berre er starten på ei rekkje nedleggingar av barnehagar i heile Noreg.

– Dette er ein varsla katastrofe, hevdar Gulati.

Har mista ein tredjedel av plassane

For både tilsette, foreldre og Fitjar kommune slo nyheita om friluftsbarnehagen ned som eit sjokk.

I løpet av seks månader har Fitjar kommune mista ein tredjedel av alle sine barnehageplassar.

Før jul la Årskog Barnehage SA ned drifta si etter mange år med økonomiske problem.

Og når den private friluftsbarnehagen legg ned frå sommaren vil det plutseleg vera 55 barnehageplassar mindre i kommunen.

Foreldre fortvilar

For Oline, mamma Malene og pappa Jonas Klemetsen, er dette ekstra tungt.

I januar 2023 starta nemleg Oline i Årskog barnehage. Der fekk ho gå i eitt år, før det vart ny barnehage.

Og ikkje før ho var ferdig med tilvenninga, kom beskjed om ny nedlegging.

– Det er trist og frustrerande for alle ungane, men ein tenkjer jo spesielt på vår eiga som akkurat har vore igjennom det same, seier Jonas Klemetsen.

– Me tenkjer jo ungane våre som aldri skal få ein fast kvardag, seier Malene.

Sett kommunen i vanskeleg situasjon

Foreldrerepresentant og trebarnsmor, Silje Johansen, har sonen Lauritz Ulversøy (5), i Fjellheim barnehage.

Ho har også ein son som skulle byrja i barnehage til hausten.

1. mars går søknadsfristen ut til nytt barnehageopptak.

– Dette stressar oss foreldre unødvendig, og det stiller kommunen i ein vanskeleg situasjon, meiner Johansen.

Frp: – Fryktar fleire legg ned

Monica Johnsen i FUS-kjeda har ikkje svart NRK på spørsmål om økonomien i Fjellheim Fus friluftsbarnehage.

Men i 2022 hadde eit underskot før skatt på minus 188.243 kroner, ifølgje offisielle rekneskap.

I 2022 vart det lagt ned 106 barnehagar ifølgje SSB. 99 av dei var private.

Barnehagepolitisk talsmann i Frp, Himanshu Gulati, meiner dette er ein konsekvens av regjeringa sin politikk.

– Ein stor del private barnehagar slit allereie med økonomien. Og me fryktar endå fleire private barnehagar kjem til å leggja ned, seier Gulati.

Full strid om ny barnehagelov

Monica Johnsen i FUS skriv til NRK at om tilskota held fram med å vera låge, vil det same skje andre stader.

Overskota i private barnehagar er nemleg på full fart nedover.

Det same er talet på nyfødde i Noreg.

Frp etterlyser no same medisin som barnehageforliket i 2003.

Det same gjer Høgre.

– Eit føreseieleg barnehagetilbod krev også at det er føreseieleg for dei som driv barnehagane. Difor ynskjer Høgre eit breitt barnehageforlik som står seg over tid, og som vil komma alle barn og familiar til gode, skriv Kari- Anne Jønnes (H).

Nyleg har forslag til ny barnehagelov vore ute på høyring.

Der har det komme inn tusenvis av høyringssvar.

Gulati i Frp er mellom dei som meiner regjeringa driv ein ideologisk kamp mot dei private, nok som vert avvist av kunnskapsminister Kari Nessa Nordtun (Ap).

Kunnskapsdepartementet: Dette vil sikra dei små barnehagane

SV er mellom dei partia som støttar lova.

– Ny lov vil sikra tryggleik for foreldre og barn, skriv Grete Wold, utdanningspolitisk talsperson i SV.

Statssekretær Synnøve Mjeldheim Skaar (Ap) seier til NRK at meininga med lovforslaget er nettopp å styrka kommunane sin moglegheit til å sikra dei små barnehagane.

Anten dei er private eller kommunale.

Ifølgje Mjeldheim Skaar er ikkje dette lov per i dag.

Med fallande fødselstal meiner Mjeldheim Skaar det er behov for ny lov som skal sikra at både private og kommunale barnehagar vert behandla likt.

– Difor er det behov for eit godt regelverk som gjer at Fitjar og andre kommunar kan halda oppe ein fornuftig og god barnehagestruktur for foreldra og ungane, seier ho.

Ho legg til at det er kommunane som til sjuande og sist må sikra nok barnehageplassar.

Kommunen fekk beskjed over natta

Fitjar-ordførar Wenche Tislevoll (H) seier avgjerda kom nærmast som eit sjokk.

– Me kan ikkje mista så mange barnehageplassar. Og no må me snu oss rundt og skaffa ei løysing, seier ho.

Men likevel lovar ho at kommunen skal klara å skaffa ei løysing, både mellombels og permanent.

Katrin Innvær Ankervold, hovudtillitsvalt i Utdanningsforbundet i Fitjar, er kritisk til prosessen.

– Dei burde i større grad ha varsla om problema slik at kommunen kunne ha teke grep tidlegare, seier ho.