Brann stadfesta fredag kveld at Lars Arne Nilsen blir trenar for klubben ut sesongen.
Brann har vore på trenarjakt sidan dei sparka Rikard Norling tidlegare denne veka. Ønsket har vore å ha på plass ein trenar innan kampen mot Follo måndag.
Fram til no har det vore assistenttrenar Robert Hauge som har hatt trenaransvaret.
- LES OGSÅ:
Tok cupgull med Hødd
Den 51 år gamle Sotrastrilen brakte suksess til fotballaget Hødd tilbake i 2012. Då tok han laget heilt til cupfinalen på Ullevaal og vann sensasjonelt NM-gullet.
Då hadde han allereie ført klubben frå 2. til 1. divisjon på første forsøk. Men i 2013 slutta han og har vore utan trenarjobb sidan då.
Han har tidlegare uttalt eit sterkt ønskje om å vera trenar for Brann.
– Viss Brann kontaktar meg nokon gang, slepp eg det eg har i hendene og stiller på dagen, sa han til Bergens Tidende i april.
Imponerande meritter
Brann skriv på nettsida si, at Nilsen har mange gode evner.
– Vi trur Lars Arne Nilsen og Brann kan bli ein god match frå første dag. Han har gitt oss eit godt innblikk i korleis han tenkjer som fagmann, og vi likar ideane hans. Det han fekk til som Hødd-trenar var imponerande, og vi meinar heilt klart at han er mogen for ei så stor oppgåve som den vi no har gitt han, seier sportssjef Rune Soltvedt til Brann.no.