Fylkeskommunen og riksantikvaren opphevar fredinga av Synneva Eri-huset i Lærdal

– For meg vil det no bli lettare å skulle bygge opp igjen huset. Når fredinga er oppheva så blir det ikkje så mange restriksjonar frå Riksantikvaren. Eg kan prege huset litt meir sjølv, seier den 19 år gamle eigaren, Leiv Thomas Faulkner.

Det over 170 år gamle Synneva Eri huset på gamle Lærdalsøyri var eit av 40 bygg som blei offer for flammane under storbrannen i Lærdal i januar. Det freda huset hadde stor antikvarisk verdi både på grunn av arkitekturen og historia til huset.

• LES ALT OM STORBRANNEN HER

Lite igjen å verne

Det var Sogn og Fjordane fylkeskommune si oppgåve å avgjere om huset skulle byggast opp att som eit freda anlegg.

– Huset er jo vekke, det er ikkje lenger noko å frede. Det måtte uansett blitt ein kopi. Det seier leiar for fylkesutvalet for kultur, Nils Gjerland.

Etter å ha utsett handsaminga av saka ein gong har dei i samråd med riksantikvaren kome til at fredingsvedtaket skal opphevast.

– Vi er ganske trygge på at vi no har gjort eit vedtak som er til gavn både for eigaren, Lærdalsøyri og Lærdal kommune.

• LES OGSÅ: Ordføraren i Lærdal: – No kan alle gå vidare
• LES OGSÅ: Umogleg å finne brannårsaka til storbrannen i Lærdal

(SAKA HELD FRAM UNDER VIDEOEN)

Vil truleg bygge opp igjen

– Eg kan sjå for meg ein eksteriør kopi, som er nokon lunde like på utsida, men med ein meir bruksvenleg løysing innvendig.

Det seier den 19 år gamle huseigaren, som ikkje heilt har bestemt for om han skal bygge opp igjen. Men mykje taler for at det er det som kjem til å skje.

• LES OGSÅ: Lærdal ber om 50 millioner kroner etter storbrann
• LES OGSÅ: Tek to til fem år før Lærdal er gjenreist

Det er ikkje minst ordføraren i Lærdal, Jan Geir Solheim glad for.

– Dette var innfallsporten til verneområdet, og det betydde mykje. Eg trur mange har merka at det er vekke.

–Det blir nesten som å mangle ei hjørnetann, det er viktig at det kjem opp att i same stilen.